Më 5 qershor kalendari Kishtar përkujton Shën Bonifacin, ipeshkëv e martir
(05.6.2010 RV)Pa veprimtarinë misionare të Shën Bonifacit, Apostull i gjermanëve,
ipeshkëv e martir,nuk do të kishte qenë i mundur organizimi politik e shoqëror evropian
i Karlit të Madh. Bonifaci ose Winfridi duket se i përkiste një familjeje fisnike
angleze të Devonshirit, ku edhe lindi rreth vitit të largët 673. Data nuk është e
sigurtë, sepse disa nga studiuesit e jetës së tij shënojnë si datëlindje vitin 680.
Para se të niste veprën e lumnueshme të ungjillëzimit të popullsive gjermanike
të përtej lumit Ren, praktikoi rregullin murgar në abacinë e Exeter-it e të Nursling-ut.
Si kapërceu vështirësitë e para, ia doli mbanësh ta përshkonte gjithë territorin gjerman
vetëm për tri vjet. Pas kësaj veprimtarie të ethshme, duke pasur parasysh vështirësitë
e kohës, u thirr në Romë nga Papa, u shugurua ipeshkëv dhe mori emrin e ri Bonifac.
Para se ta organizonte Kishën në bregun e djathtë të Renit, mendoi të
themelonte, ndërmjet zonës së Hessen-it e të Turingjisë, një abaci, që u bë qendër
me rëndësi të dorës së parë e përshpirtërisë dhe e kulturës fetare në Gjermani. Lindi
kështu abacia e famshme e Fuldës. Si seli ipeshkvnore zgjodhi qytetin e Maincit (Meinz)..
Pak vjet më parë, kur në Fuldë të Gjermanisë u kremtua 1250 vjetori i
vdekjes së Shën Bonifacit, Papa Gjon Pali II u pati drejtuar gjermanëve një Mesazh,
përmes të cilit i inkurajonte të ndjekin shembullin e këtij njeriu me besim të patundur,
të këtij rregulltari me fe të gjallë ndërmjet vështirësive të panumërta, të këtij
ipeshkvi, që dha jetën për e duke predikuar fjalën e Ungjillit.
Figurë
e ndritur dhe e dashur për Kishën katolike gjermane, Shën Bonifaci është varrosur
në Fuldë, sipas dëshirës së tij, pasi u mbyt nga paganët më 5 qershor në vitin 754,
në moshën 80 vjeçare.
E martirizuan sepse shqetësonte shumëkënd me shenjtërinë
e misionin e tij, sepse as lodhja, as mosha e as kërcënimet nuk e patën përkulur,
por pati mbetur predikatar i zjarrtë e i palodhur i fjalës së Krishtit, shembull
i ndritur për Kishën katolike gjermane e universale.
Papa në audiencën e
përgjithshme të 12 marsit 2009, foli për Shën Bonifacin, ipeshkëv (12.03.2009
RV) Në qendër të vëmendjes në audiencën e përgjithshme, mbajtur sot paradite në
Sheshin e Shën Pjetrit në Vatikan, ishte figura e Shën Bonifacit, ipeshkëv që jetoi
në shekullin VIII.
Pra katekizmin e sotëm Benedikti XVI ia kushtoi pikërisht
këtij njeriu, që në kohët e tij pati punuar, e me sukses, për një shoqëri paqësore,
të drejtë, ku duhet të mbretëronte pajtimi, që buron nga vlerat e krishtera. Duke
folur për ipeshkvin anglosakson, Shën Bonifacin, i cili jetoi 1300 vjet më parë, Papa
Benedikti XVI e quajti “misionar i madh”, që predikoi Ungjillin në Evropën qendrore
me rezultate të tilla, sa të mbetej në kujtesën e njerëzimit si ‘apostull i gjermanëve”. “Ai
shartoi në trungun e popujve gjermanikë një stil jete më njerëzor, falë të cilit respektoheshin
më mirë të drejtat e patjetërsueshme të njeriut (…). Duke e krahasuar fenë e tij të
flaktë e zellin e tij për Ungjillin me fenë tonë, tepër shpesh të vaktë e të burokratizuar,
shohim ç’duhet të bëjmë e si duhet ta përtërijmë fenë tonë, për t’i dhuruar kohëve
tona, margaritarin e çmuar të Ungjillit”.
Falë këtyre cilësive të mëdha
prej apostulli, të cilave u shtohej edhe një kulturë e rafinuar dhe e gjithanshme,
Bonifaci kërkoi e mori leje nga Papa Gregori, i cili e shuguroi ipeshkëv, të nisej
për të predikuar Ungjillin në qendër të Evropës, duke hequr dorë nga qetësia e nga
studimet e jetës monastike. Nisi kështu një veprimtari të palodhshme, i mbështetur
prej murgjërve e murgeshave, nga përshpirtëria e të cilëve vinte e për të cilët themeloi
manastire të reja. Ky përkushtim e kjo besnikëri e pacenueshme ndaj Selisë Apostolike,
ia ndryshuan faqen Evropës:
“Fryt i këtij impenjimi qe fryma e fuqishme
e lidhjes rreth Pasardhësit të Shën Pjetrit, që Bonifaci ua transmetoi Kishave të
territorit të misionit, duke bashkuar me Romën Anglinë, Gjermaninë, Francën e duke
kontribuar, kështu, në mënyrë vendimtare, për hedhjen e atyre rrënjëve të krishtera
të Evropës, që do të prodhonin fryte të begata në shekujt e më pasmë”.
Shën
Bonifaci vdiq martir në vitin 754: por nuk vdiq zelli i tij e stili i tij baritor,
në qendër të të cilit ishte gjithnjë Fjala e Hyjit, e as predikimi i tij i pareshtur,
që e vijoi deri në moshë të shtyrë. Një stil – pohoi Papa – që u kujton besimtarëve
të sotëm se krishterimi, duke favorizuar përhapjen e kulturës, luan një rol të dorës
së parë në përparimin e njeriut. E pikërisht mbi zellin e Shën Bonifacit vuri
theksin Papa gjatë përshëndetjeve drejtuar grupeve të ndryshme dioqezane, të pranishme
në audiencë, duke e treguar si shembull që meriton të ndiqet, posaçërisht në këtë
kohë Krezhmësh:
“Miq të dashur, kjo koha jonë, në të cilën nuk mungojnë
hijet, duhet ndriçuar nga dielli i gjallë i shpresës, nga Krishti, shpresa jonë. Ai
premtoi se do të rrinte gjithnjë me ne e ne e ndjemë praninë e tij në mënyra nga më
të ndryshmet. E keni për detyrë ta kumtoni e ta dëshmoni dashurinë e panjollë, që
na shoqëron në çdo situatë. Mos u lodhni kurrë s’i besuari Krishtit e s’e përhapuri
Ungjillin e tij në çdo mjedis”.