Papa në Pafo: Kisha Katolike e Kisha Ortodokse e Qipros, urë ndërmjet Lindjes e Perëndimit,
impenjohen të ecin në rrugën e dialogut e të bashkëpunimit vëllazëror.
(04.06.2010 RV)Në orët e para të pasdites, Benedikti XVI shkoi në kishën e
Agìa Kiriakì Chrysopolitissa, vend kulti ortodoks, i hapur edhe për katolikët e anglikanët.
Për ta pritur, te shkallët e Kishës kishte dalë famullitari i bashkësisë latine, atë
Elias. Pranë kësaj Kishe ngrihet “Shtylla e Shën Palit”, objekt devocioni popullor.
Sipas gojëdhënave, shtylla u vendos në atë vend, ku Pali u ndesh me Elimin, magjistarin,
dhe e detyroi të hiqte dorë nga shtrembërimi i udhëve të drejta të Zotit” (Vap
13, 5-12). Papa hyri në
Kishë, ku e prisnin disa meshtarë e rregulltare të klauzurës, dhe u lut në heshtje
para Ikonostasit. Pastaj, duke kaluar nëpër sakresti, doli nga porta qendrore e Kishës,
përballë së cilës ishte ngritur podiumi, ndërsa besimtarët ishin mbledhur në zonën
arkeologjike. Kremtimi ekumenik filloi me përshëndetjen drejtuar Benediktit XVI nga
kryepeshkopi ortodoks i Qipros, Krizostomos II e, më pas, me leximin e Shtegtimit
të parë të Shën Palit e të Shën Barnabës, në këto vise, (Vap 13,1-12), ku sot
shkeli për herë të parë këmba e një pasardhësi të Shën Pjetrit. Pas Leximit, fjala
e Benediktit XVI, i cili u drejtoi besimtarëve përshëndetjen e parë në gjuhën greke:
“Paçi hir e paqe të plotë”(1Pt 1,2), duke shprehur, kështu, gëzimin për praninë
e tij në mes të bashkësive të krishtera në Ishull. Pastaj- falënderimet e përshëndetjet,
drejtuar Fortlumturisë së Tij, Krizostomi II, Hirësisë së Tij, Gjorgj, Metropolit
i Pafos si dhe gjithë të krishterëve të konfesioneve të ndryshme, duke përfshirë besimtarët
e bashkësisë armene, luterane e anglikane, mbledhur me shumicë rreth Papës. Hir i
vërtetë, e quajti Benedikti XVI, bashkimin e besimtarëve për t’u lutur së bashku në
Kishën e Agìa Kiriakì, Zonjës së Shenjtë të Mbështjellë me Ar. Pastaj, Benedikti
XVI u përqendrua kryesisht tek komenti i Leximit të fragmentit, shkëputur nga Veprat
e Apostujve (cfr At 13,1-4), që flet për zanafillën apostolike të krishterimit
në Ishull. Kisha e Qipros ka plotësisht të drejtë të jetë krenare për lidhjen e
saj me predikimin e Palit, të Barnabës e të Markut, si dhe për bashkimin në fenë apostolike,
e cila e lidh me të gjitha Kishat, që ndjekin të njëjtin rregull të fesë: “Ky
është bashkimi, real, ndonëse i pakryer, i cili tashmë na afron, na nxit t’i kapërcejmë
përçarjet tona e të luftojmë për të rikrijuar bashkimin e plotë, të dukshëm, që e
desh vetë Zoti për ndjekësit e Tij, të cilët duhet të jenë “një trup i vetëm e një
shpirt i vetëm”. “Bashkimi kishtar në fenë apostolike është dhuratë, por
edhe thirrje për mision. Në fragmentin që lexuam – vijoi Ati i Shenjtë – shikojmë
figurën e unitetit të Kishës në lutjen e në gatishmërinë për t’iu përgjigjur shtytjeve
të Shpirtit Shenjt për mision. Ashtu si Pali e Barnaba, çdo i krishterë, përmes pagëzimit,
është i caktuar të kumtojë dëshminë profetike të Zotit të ngjallur dhe lajmin e tij
të pajtimit, të mëshirës e të paqes: “Në rrethana të tilla, Asambleja
e Posaçme e Sinodit të Ipeshkvijve për Lindjen e Mesme, që do të mblidhet në Romë,
tetorin e ardhshëm, do të reflektojë mbi rolin jetik të të krishterëve në zonë, do
t’i inkurajojë të japin dëshminë e tyre për Ungjillin e do t’i ndihmojë të punojnë
me frymën e dialogut e të bashkëpunimit ndërmjet gjithë të krishterëve të zonës”. Kuptimplotë
fakti – vijoi të shpjegonte Papa- që punimet e Sinodit do të pasurohen me praninë
e delegatëve vëllezër të Kishave e të bashkësive të tjera të krishtera të zonës, si
shenjë e impenjimit të përbashkët në shërbim të fjalës së Zotit e në përpjekjen për
t’ia hapur zemrat Hirit të tij, që pajton. Më pas Ati i Shenjtë theksoi se bashkimi
i dishepujve të Krishtit është dhuratë, që duhet lypur me lutje nga Ati Hyjnor, me
shpresë që të forcojë dëshmimin e Ungjillit në botën e sotme e me vetëdijen se vetë
Zoti u lut për shenjtërinë dhe bashkimin e dishepujve të vet, pikërisht që bota të
besojë. Benedikti XVI përkujtoi edhe një ngjarje vërtet të rëndësishme për bashkimin
e të krishterëve: njëqind vjetorin e Konferencës Misionare të Edimburgut, përmes së
cilës zu fill lëvizja ekumenike. Kjo lëvizje, posaçërisht në dhjetëvjeçarët e fundit,
i nxiti të krishterët të rizbulojnë trashëgiminë e pasur apostolike të Lindjes e të
Perëndimit dhe, përmes një dialogu durimtar e të sinqertë, të gjejnë rrugë të reja
për t’u afruar me njëri-tjetrin, duke i kapërcyer grindjet e së kaluarës e duke shikuar
drejt një ardhmërie më të mirë: “Kisha e Qipros – theksoi Benedikti XVI –
që dëshmon se është urë ndërmjet Lindjes e Perëndimit, ka dhënë një ndihmesë të çmuar
në këtë proces pajtimi. Udha, që çon drejt objektivit të bashkimit të plotë - kujtoi
me realizëm të thellë Ati i Shenjtë - nuk do të jetë, sigurisht, pa vështirësi, por
Kisha Katolike e Kisha Ortodokse e Qipros impenjohen të ecin përpara në udhën e dialogut
e të bashkëpunimit vëllazëror”. E Benedikti XVI iu lut Shpirtit
Shenjt të fuqizojë hapat, të ndriçojë mendjet e të forcojë vendosmërinë e të dyja
palëve, për t’ua kumtuar së bashku burrave e grave të kohëve tona, lajmin e mirë të
shëlbimit. Në përfundim, Ati i Shenjtë kujtoi shenjtorët, që stolisin Kishën e
Qipros, posaçërisht Shën Epifanin, ipeshkëv i Salaminës, duke theksuar se shenjtëria
është përpjekje për t’i përngjarë sa më shumë Krishtit, Shëlbuesit tonë. E ndërsa
falënderonte Zotin për takimin e sotëm, Papa iu lut Shenjtorëve Barnaba e Epifani,
Pjetri e Pali dhe të gjithë shenjtorëve të Zotit, t’i bekojnë bashkësitë e krishtera,
t’ua ruajnë fenë, që morën nga apostujt e t’u prijnë në udhën e bashkimit të plotë,
të dashurisë së krishterë e të paqes.
Pas kremtimit Benedikti XVI hyri përsëri
një çast në sakresti, ku bekoi pllakën përkujtimore të një shtëpie për të moshuar,
realizuar nga bashkësia katolike latine e Pafos. Duke dalë nga sakrestia, disa fëmijë
kapërcyen gardhin e vënë rreth podiumit të kremtimit e, pa i përfillur forcat e rendit,
e rrethuan me dashuri të madhe Atin e Shenjtë, të lumtur që mundën t’i puthin dorën
e të marrin nga ai përkëdheljet dhe bekimin atëror. Pas kësaj ngjarjeje kaq të këndshme,
Papa Benedikti u nis për në Nikozi e, në sa ne transmetojmë, ndodhet në nunciaturën
apostolike, në kompleksin e Kuvendit françeskan të Shenjtes Krygjë, pronë e Rojtarisë
së Tokës Shenjte. Kompleksi përfshin Kishën-famulli të bashkësisë latine, me të njëjtin
emër. Ndërtesa ndodhet në zonën e kontrolluar nga Kombet e Bashkuara dhe kufizohet
në tri anët me zonën e veriut të ishullit, që u vetshpall “Republika e Qipros së Veriut”,
më 1983. Në Nikozi nesër, më 5 qershor, Papa do të takohet me autoritetet civile
dhe me Trupin Diplomatik, me bashkësinë katolike të Qipros, me Fortlumturinë së Tij,
Chrysostomos II, Kryepeshkop i Qipros dhe me meshtarët, rregulltarët, rregulltaret,
diakonët, katekistët e anëtarët e Lëvizjeve Kishtare, në Meshën Shenjte, që do ta
kryesojë në Kishën famullitare latine të Holy Cros (Shenjtes Krygjë). Ju ftojmë
ta ndiqni, së bashku me ne!