Selia e Shenjtë emëron vizitatorët apostolikë për skandalin e abuzimeve në Kishën
e Irlandës
Salla e Shtypit e Selisë së Shenjtë bëri të ditur sot vendimin e Papës për
Vizitën Apostolike, që e pati lajmëruar në letrën drejtuar katolikëve të Irlandës.
Vizitatorët e caktuar nga Benedikti XVI do të thellohen në problematikat e dala nga
abuzimi i disa anëtarëve të klerit me të miturit. Vizita do të fillojë në vjeshtë
dhe do të përfshijë katër kryedioqeza irlandeze (Armag, Dublin, Kashel dhe Emli, Tuam).
Do të kontrollohet edhe formimi i klerit, jo vetëm në seminaret e Institutet rregulltare
në vend, por edhe në seminaret dhe në Kolegjin Papnor Irlandez në Romë. Në notën,
që shoqëron komunikatën e Selisë së Shenjtë, zëdhënësi i Vatikanit, atë Federiko Lombardi
sqaron se prelatët e caktuar si vizitatorë janë të nivelit të lartë. Shqyrtimi i katër
dioqezave irlandeze u është besuar kardinajve Marfi O’Konor dhe O’Mallej (ish-kryeipeshkëv
i Uestminsterit i pari, dhe kryeipeshkëv i Bostonit, i dyti), si edhe dy kryeipeshkvijve
kanadezë Kollins dhe Prendergast (njëri i Torontos, tjetri i Otauës). Seminaret do
t’i kontrollojë kryeipeshkvi i Nju Jorkut, imzot Timoti Dolan, ndërsa institutet e
rregulltarëve dhe të rregulltareve, redemptoristi Jozef Tobin, jezuiti Gero MekLaflin,
motra Sharon Holland e Zemrës së Papërlyer të Zojës, motër Mairin MekDonaf, kanoniste.
Në komunikatë saktësohet se qëllimi i vizitës duhet kuptuar si “ndihmë e Selisë
së Shenjtë për ipeshkvijtë, klerin, rregulltarët dhe besimtarët laikë, që të përballojnë
sa më mirë situatën e shkaktuar nga ngjarjet tragjike të abuzimeve, kryer nga meshtarë
e rregulltarë, në dëm të të miturve, dhe si kontribut për përtëritjen shpirtërore
e morale, të dëshiruar e të filluar nga Kisha në Irlandë”.