Փոքրիկ Թերեզան տասը տարեկան է: Դեղին ծամերով, ծաւի աչքերով
այդ գեղեցիկ ֆրանսուհին, ընտանիքի բացառիկ սիրոյն ու գուրգուրանքին առարկան է: Մարմնական
գեղեցկութեան կը միացնէ նաեւ հոգեկան ազնիւ ձիրքեր, որոնք շատ բարձր են իր տարիքէն: Երկինքէն
ցանուած ծաղիկ մըն է, որ սակայն գերազանց բարեպաշտութեամբ լեցուած հօր, մօր եւ քոյրերու
գուրգուրոտ խնամքին տակ կ’աճի ու կը մեծնայ սպիտակ թերթերով ու բոյրով: Յանկարծ հիւանդութիւն
մը կը յայտնուի իր մէջ եւ անկողին կ’իյնայ: Հայրն ու քոյրերը կը դիմեն բժիշկներու
եւ դեղերու, բայց այդ ախտը, փոխանակ նուազելու աւելի եւս կը ծանրանայ: Գլխու այնպիսի
ցաւեր կ’ունենայ, որ ջերմը կը բարձրանայ եւ կը սկսի զառանցել եւ չճանչնալ մինչեւ իսկ
ամենամօտիկ սիրելիները: ”Այն վայրկեաններուն որ ցաւերս կը մեղմանային, ծաղիկէ պսակներ
կը նուիրէի Ս. Աստուածամօր”: Երբ բժիշկները յայտարարեցին թէ այլեւս մարդկային հնարք
չկար բուժումի, բարեպաշտ հայրը կանչեց իր Մարիամ՝ անդրանիկը դուստրը եւ ոսկի դրամներ
դնելով իր ափը ըսաւ անոր. -Վազէ աղջիկս, Փարիզի Յաղթութեան Տիրամօր տաճարին մէջ պատարագ
եւ աղօթք ընել տուր: Մինչ այդ տնեցիներն ալ իննօրեայ մը սկսան Ս. Տիրամօր: Թերեզի
անկողինին մօտիկը, զարդասեղանին վրայ Աստուածամօր սիրուն արձան մը կար, ընտանիքին պաշտպանը: Մարիամ
երբ տեսաւ, որ վերջին փորձն ալ անօգուտ եղաւ, արտասուալից աչքերով, ծունր դրաւ անոր առջեւ
եւ բոլոր եռանդով եւ հաւատքով պաղատեցաւ Ս. Կոյսին որ բուժէր իրենց քոյրը: Նոյն վայրկեանին
Լեոնի եւ Սելին քոյրերն ալ ծունկի եկան: Իսկ Թերեզ այս տեսնելով ինքն ալ միացաւ անոնց
եւ աղօթքի քաղցր բոյրը հասաւ Տիրամօր: Ս. Աստուածածին չդիմացաւ այսքան յուսալից ու
սրտագին աղօթքներուն: ”Յանկարծ արձանը ոգեւորուեցաւ, կը պատմէ Թերեզ, Ս. Կոյսը գեղեցիկ
կերպարանք մը առաւ, այնքան անօրինակ, որ պիտի չկարենամ մարդկային բառերով նկարագրել:
Իր դէմքը քաղցրութիւն մը, բարութիւն մը եւ անճառելի գորով մը կը ներշնչէր: Բայց ինչ որ
հոգիիս խորը թափանցեց, իր գրաւիչ ժպիտն էր: Դէպի ինծի յառաջացաւ, կրկին ժպտեցաւ: Այն
ատեն բոլոր նեղութիւններս փարատեցան, երկու խոշոր արցունքներ լռուեամբ հոսեցան բիբերէս… Անխառն
ուրախութեն արցունքներ էին անոնք”: Առողջացաւ Թերեզ, սպիտակ ծաղիկը կանգնեցաւ իր ձողունին
վրայ եւ տունը լեցուեցաւ ուրախութեամբ: Այս երջանիկ աղջիկն էր, որ հինգ տարի ետք,
Աստուծոյ բացառիկ կարգադրութեամբ, Կարմեղոսի խստակեցա վանքը կը մտնէր եւ հոն կը սրբանար
հերոսակակն առաքիննութիւներով: