Refugjatët, në qendër të vëmendjes gjatë bisedimeve të Papës me presidentin e Kongos,
Sassou N’Guesso.
(24.05.2010 RV)Benedikti XVI priti sot në audiencë presidentin e Republikës
së Kongos, Denis Sassou N’Guesso, i cili më pas u takua edhe me kardinalin Tarçizio
Bertone, Sekretar i Shtetit të Vatikanit dhe me Imzot Dominik Mambertì, Sekretar për
marrëdhëniet me shtetet.Gjatë bisedimeve të përzemërta – njofton një komunikatë e
Sallës së Shtypit të Vatikanit – u kujtuan nismat kushtuar pesëdhjetë vjetorit të
pavarësisë së vendit. U shpreh edhe dëshira e përbashkët për forcimin e mëtejshëm
të marrëdhënieve të mira ndërmjet Selisë së Shenjtë e Republikës së Kongos, duke nënvizuar
posaçërisht kontributin e Kishës katolike në ndihmë të njeriut, pa asnjë dallim,
e të zhvillimit shoqëror e kulturor të popullsisë. Së fundi, u shkëmbyen mendime lidhur
me situatën politike e shoqërore në rajon, duke nënvizuar problematikat humanitare
e, në mënyrë të veçantë, ndihmën që u duhet dhënë refugjatëve.