Në Mbretëreshën Qiellore, Papa përshëndet Lëvizjen për Jetën, kujton Ditën e lutjes
për Kishën në Kinë
(23.05.2010 RV)Pas Meshës në Bazilikën e Vatikanit, Papa kryesoi lutjen e Mbretëreshës
Qiellore nga dritarja e studios së tij private. Dhjetra mijëra, besimtarët e mbledhur
në sheshin e Shën Pjetrit në një ditë të mrekullueshme me diell. Benedikti XVI nënvizoi
se Kisha jeton vazhdimisht në bashkim me Shpirtin Shenjt e gjatë historisë së saj,
ka përjetuar shumë Rrëshajë, si për shembull, Koncilin II të Vatikanit. Nuk ka Kishë
pa Rrëshajë, theksoi Ati i Shenjtë, e nuk ka Rrëshajë pa Virgjërën Mari, siç treguan
takimet në udhëtimin e tij të fundit në Fatima, ku një turmë e jashtëzakonshme njerëzish
u mblodh në lutje me një zemër e një shpirt të vetëm. Papa u lut edhe për meshtarët,
gjatë këtij Viti kushtuar atyre, që të jenë të denjë për t’u shpallur të gjithë njerëzve
mesazhin e shëlbimit të Ungjillit. Pastaj kujtoi se dje, në Benevento të Italisë,
u shpall e Lume, Tereza Manganielo, besimtare laike, anëtare e Urdhërit të Tretë françeskan.
Mesha u kremtua nga kryeipeshkvi Anxhelo Amato, prefekt i Kongregatës për Çështjet
e Shenjtorëve. Bija e njëmbëdhjetë e një familjeje fshatarësh, që ka jetuar në vitet
‘800, e Lumja e re kaloi një jetë të thjeshtë e të përvuajtur, mes punëve të shtëpisë
e impenjimit shpirtëror në kishën e fretërve kapuçinë: “Ashtu si Shën Françesku
i Asizit, ajo përpiqej të imitonte Jezu Krishtin, duke ofruar vuajtje e pendesë për
shpërblimin e mëkateve, dhe ishte plot me dashuri për të afërmin: përpiqej për të
gjithë, sidomos për të varfërit e të sëmurët. Gjithnjë e buzëqeshur dhe e ëmbël, vetëm
në moshën 27 vjeçare u nis për Qiell, aty ku banonte zemra e saj. Falenderojmë Zotin
për këtë dëshmitare të ndritshme të Ungjillit”. Papa kujtoi se nesër, më 24
maj, në kujtimin liturgjik të Zojës Ndihmëtare, kremtohet edhe Dita e lutjes për Kishën
në Kinë: “Ndërsa besimtarët në Kinë luten që bashkimi ndërmjet tyre e me Kishën
Universale të thellohet gjithnjë e më shumë, katolikët e mbarë botës – sidomos ata
me origjinë kineze – të bashkohen me ta në lutjen e bamirësinë, që Shpirti Shenjt
ndikon në zemrat tona veçanërisht në solemnitetin e sotëm”. Në përfundim,
Papa përshëndeti anëtarët e Lëvizjes për Jetën, e cila përpiqet të përhapë kulturën
e jetës dhe të ndihmojë konkretisht gratë të çojnë deri në fund shtatzani të vështira: “Të
dashur miq, sëbashku me ju kujtoj fjalët e së Lumes Terezë të Kalkutës: ‘Ai fëmijë
i vogël, i lindur ose i palindur akoma, është krijuar për diçka të madhe: të dojë
dhe ta duan”.