Feja të nxisë harmoninë dhe zhvillimin: kështu i tha Papa ambasadorit të ri të Mongolisë
(20.05.2010 RV)Sot paradite, Papa priti në audiencë edhe ambasadorin e Mongolisë,
Luvsantersen Orgil, i cili paraqiti letrat kredenciale në Vatikan. Këtë vit, Mongolia
kremton 20 vjet demokraci, ndërsa në vitin 2012 do të festojë dy dekadat e marrëdhënieve
diplomatike me Selinë e Shenjtë. Në fjalimin e tij, Benedikti XVI shprehu vlerësim
për lirinë e fesë, që ekziston në vend, dhe u tregua solidar me viktimat e të ftohtit
polar, që përfshiu Mongolinë këtë dimër. Kisha e vogël e Mongolisë numëron 650
besimtarë, dhjetra katekumenë, 87 misionarë e katër famulli. Numra të kënaqshëm për
një vend me shumicë budiste, që në vitin 1995 kishte vetëm 14 katolikë.