Սպեղանի երգչախումբը ձայնագրած է Ղարաբաղի պատերազմի զոհերու յիշատակին նուիրուած
ձայնասկաւառակ մը։
Երեւանի մէջ 11 մայիսին տեղի ունեցած է Սպեղանի երգչախումբին
Սուրբ պատարագի երգեցողութիւնը Կոմիտասի մշակումով ձայնասկաւառակին շնորհահանդէսը։ Ձայնասկաւառակը
ձայնագրուած է հայ անուանի երգահան Կոմիտասի ստեղծագործութիւններու ժողովածուի 7-րդ հատորին
հիման վրայ՝ երաժշտագէտ Ռոպերթ Աթայեանի խմբագրութեամբ։ Ձայնասկաւառակը նուիրուած է Ղարաբաղի
զոհերու յիշատակին։ Նշենք, որ ձեռնարկին կարգախօսը եղած է հայ գրող Գրիգոր Նարեկացիի
՜՜Սպեղանիք զօրաւորք վիրաց անբժշկականաց, դեղք ազդողականք, ցաւօք անտեսականաց՝՝ ասոյթը։
Սպեղանի երգչախումբը հիմնուած է 1996-ին. մասնակցած է շատ մը միջազգային փառատօներու,
ինչպէս նաեւ մէկ բեմի վրայ ելոյթ ունեցած է Հայաստանի մշակոյթի անուանի գործիչներու հետ
ինչպէս Հայաստանի մէջ, այնպէս ալ անոր սահմաններէն դուրս։ Սպեղանի երգչախումբը ելոյթներ
ունեցած է նաեւ Իտալիոյ մէջ, յատկապէս նաեւ Հռոմի մէջ, ուր ընդունուած է Լեւոնեան վարժարանի
եւ Հռոմի Հայ Համայնքի խորհուրդի կողմէ։ Երգչախումբին հիմնադիրը, գեղարուեստական ղեկավարը
եւ խմբավարն է Սարինա Աւթանդիլեան ։
Երեւան-Համերգ երգահան
Գարի Քէօսայեանի :
Երեւանի Ալ Սպենդիարեանի անուան օփերայի եւ պալէի ազգային
ակադեմական թատրոնին մէջ 15 մայիսին տեղի ունեցած է համերգ մը որու ընթացքին առաջին
անգամ հնչած են երգահան Գարի Քէօսայեանի ստեղծագործութիւնները։ Համերգին ներկայացուած
են երաժշտահանին ճազ-ստեղծագործութիւնները, դասական երաժշտութիւնը, ինչպէս նաեւ՝ Ֆրանց
Վերֆելի Մուսա լերան 40 օրը վէպին բեմականացման համար գրուած համանուագը։ Երաժշտահանին
հետ ելոյթ ունեցած է պետական երիտասարդական նուագախումբի գլխաւոր խմբավար Սերգէյ Սմբատեանը։
Հիւրաբար համերգին ներկայ գտնուած է ամերիկացի երգչուհի Ինտեան, որ բազմիցս հիացուցած
է հայ հանդիսատեսը՝ ճազի կատարման իր արուեստով։ Լոս Անճելըս Թայմզ թերթին մէջ նշուած
է, որ Գարի Քէօսայեանի երաժշտութիւնը թարմ շունչ է ճազի մէջ։ Ան կօգտագործէ նոր ներդաշնակող
լուծումներ եւ նորայայտ մեթոտներ։ Գ Քէօսայեանի երաժշտութիւնը ունկնդիրը հաղորդակից կը
դարձնէ գեղեցիկին եւ յաւերժին՝ մնալով միշտ թարմ եւ նոր։ Գարի Քէօսայեանի առաջին Քեզ
համար անուանումով ալպոմը հրապարակուած է 1998-ին, որ դարձած է տարուան լաւագոյն ճազ-ալպոմը,
իսկ երաժիշտը՝ Միացեալ Նահանգներու լաւագոյն ճազ երաժիշտը։