Польшча перадала Беларусі ўнікальныя допісы папскіх нунцыяў XVI-XVIII ст.
У Нацыянальнай бібліятэцы Беларусі адбылася ўрачыстая перадача Амбасадай Польшчы
ў Менску шматтомнага выданьня першакрыніц, якія змяшчаюць штотыднёвыя допісы папскіх
нунцыяў у Ватыкан з тэрыторыі Першай Рэчы Паспалітай. Перададзеныя 26 тамоў (а ўсяго
выдадзена 34). Гэта ставіць нашую біліятэку наперадзе вядучых бібліятэк тэрыторыі
былога Савецкага Саюзу, бо нідзе больш гэтыя кнігі пакуль не прысутнічаюць у такой
колькасьці. Цырымонію перадачы адкрываў асабіста дырэктар бібліятэкі Раман Матульскі,
які сказаў: “Мы ўдзячныя ўсім, хто прысутнічае сёньня на нашай сустрэчы з нагоды перадачы
Амбасадай Польшчы нашай бібліятэцы шматтомнага выданьня Нунцыяната Каталіцкай царквы
на тэрыторыі Рэчы Паспалітай. Гэтае марапрыемства мы сапраўды рыхтавалі з амбасадарам,
спадаром Літвіным, даўно. Гэта прыемная навіна й прыемная акцыя для нашай бібліятэкі.
На жаль, яна адбываецца ў трагічныя для Польшчы й для нашай краіны дні – дні трагедыі
пад Смаленскам. Ва ўрачыстасьці ўзяла ўдзел прафэсар Тэрэса Хынчэўска-Геннэль,
сябра Польскай акадэміі навук, адная з суаўтарак выданьня. Прафэсар апавяла, што для
вывучэньня гэтых першакрыніц ёй давялося вывучыць стараіталійскую мову. Яна сказала,
што “Апостальская сталіца была зацікаўленая вывучэньнем гэтага краю, у які высылала
сваіх нунцыяў. Хацела зразумець, на чым грунтавалася шляхецкая дэмакратыя, як гэты
край функцыянаваў. Без разуменьня гэтай дзяржавы немажліва было б высылаць сваіх дыпляматаў.
Таму ў інструкцыях для нунцыя бачым, што ён мусіў вельмі пільна падыходзіць да фактаў,
бо тут жылі ня толькі каталікі, але й праваслаўныя, лютаране, кальвіністы… Трэба было
зьвяртаць увагу, што Рэч Паспалітая карысталася ваеннай сілаю казакаў, якія былі праваслаўнымі.
Цікава, што гэтае праваслаўе казакаў бачылі папскія нунцыі, але вельмі часта ня бачыла
польская шляхта…”