Ditët e kulturës dhe të përshpirtërisë ruse në Vatikan: katolikët e ortodoksët rusë
gjithnjë më pranë.
(19.05.2010 RV)Nxitja e dialogut ndërmjet ortodoksëve e katolikëve: ky është
qëllimi i dy ditëve të kulturës e të përshpirtërisë ruse në Vatikan, që u hapën sot,
me veprimtari të ndryshme. Me këtë rast, nesër pasdite, në Sallën e Palit VI, në
orën 18.00, Orkestra kombëtare ruse e Shën Pjetërburgut, do të japë një koncert, ofruar
Papës nga Patriku Rus i Moskës e i gjithë Rusive, Kirill. Sot paradite, metropoliti
Hilarion Alfejev i Patriarkanës së Moskës, u takua me kardinalin Valter Kasper, kryetar
i Këshillit Papnor për nxitjen e bashkimit të të krishterëve dhe me kryeipeshkvin
Xhanfranko Ravazi, kryetar i Këshillit Papnor të Kulturës, organizator i takimit,
përfunduar me një konferencë shtypi. U theksua se sfida e përbashkët e ortodoksëve
dhe e katolikëve është mbrojtja e vlerave të krishtera në shoqëri, posaçërisht në
vendet e çkristianizuara, me vetëdijen se katolikë e ortodoksë nuk janë konkurentë,
por aleatë. U fol shumë edhe për kulturën, e kur flitet për kulturë - nuk mund
të mos flasësh edhe për përshpirtëri – siç na e kujton shkrimtari gjenial rus, Leon
Tolstoi, njëqind vjet pas vdekjes, në sa Italia përgatitet ta festojë 2011-tën si
vit kushtuar pikërisht kulturës ruse. Por, në ç’pikë ka arritur dialogu ekumenik,
në perspektivë të një takimi të mundshëm të Patrikut të Moskës me Papën? Metropoliti
Hilarion shprehu dëshirën që një takim i tillë historik, i pari ndërmjet kryetarëve
të të dyja kishave, të jetë pikërisht ndërmjet Patrikut Kirill e Benediktit XVI,
të cilin Kisha ortodokse e vlerëson lart për qëndrimin e tij në çështjet morale e
në impenjimin për mbrojtjen e vlerave tradicionale të krishtera.