Benedikti XVI në audiencën e përgjithshme kushtuar shtegtimit në Portugali: nga Fatima
vjen një mesazh, që të ngushëllon e të mëson të shpresosh në Zotin!
(19.05.2010 RV)Mesazhi, që vjen nga Fatima, shkon përtej kërcënimeve e tmerreve
të historisë! Flet për shpresë e besim në Zotin. Benedikti XVI e përsëriti këtë bindje
në audiencën e sotme të përgjithshme, mbajtur në Sheshin e Shën Pjetrit, në Vatikan,
gjatë së cilës, përballë më se 30 mijë vetëve, shtegtarë e besimtarë, kujtoi etapat
kryesore të vizitës së tij apostolike në Portugali. Gjatë përshëndetjeve, Papa e ftoi
Kishën të lutet në prag të solemnitetit të Rrëshajëve. Nga Fatima vjen
një mesazh ngushëllues, jo frikësues. Benedikti XVI e fton një botë, e cila tepër
shpesh e shikon gjithçka me mosbesim, të mos e shtrembërojë atë, që u tha Zoja e Bekuar
tre barinjve të vegjël, në një ditë të largët, 93 vjet më parë, duke iu dukur në
atë hapësirë të privilegjuar, të hapur nga qielli, përmbi tokë. Hapësirë e cila, që
asokohe – pohoi Papa – na mëson të shpresojmë në mëshirën hyjnore, që shëron e shpëton: “Është
një mesazh i përqendruar mbi lutjen, mbi pendesën e mbi kthimin në rrugën e Zotit,
që i kapërcen kufijtë e kërcënimeve, të rreziqeve, të tmerreve të historisë, për ta
ftuar njeriun të ketë besim në veprën e Zotit, të ushqejë Shpresën e madhe, të provojë
hirin e Hyjit, për t’u dashuruar me Atë, që është burim i dashurisë e i paqes”. Nën
qiellin ngjyrë hiri të një pranvere, që po vonon të lulëzojë, Benedikti XVI riktheu
në Sheshin e Shën Pjetrit, ditët që i jetoi në Portugali. Përvojë prekëse, tejet e
pasur me dhurata shpirtërore – e quajti - që nga ora e parë e nga perceptimi i parë,
i cili të bën ta ndjesh veten shok udhe me njeriun, nën shenjën e Zojës së Fatimës,
në atë vend ku Virgjëra Mari na drejtoi të gjithëve ftesën për ta parë tokën si vend
të shtegtimit tonë drejt atmes përfundimtare, drejt Qiellit: “Gjatë
gjithë shtegtimit (…) e ndjeva pranë meje paraardhësin tim të dashur, të përnderuarin
Gjon Pali II, që shkeli tri herë në Fatima, duke falënderuar atë dorë të padukshme,
që e çliroi nga vdekja në atentatin e 13 majit, këtu në Sheshin e Shën Pjetrit”. Nga“festa e fesë dhe e shpresës”, tek Mesha e kryesuar në Terreiro do Paço të Lisbonës,
ndërmjet qytetit e lumit Tago, tek takimi me përfaqësuesit e botës së kulturës, në
Qendrën kulturore të Belém, gjithçka u përqendrua tek një urdhërim i vetëm: të rizbulohet
Ungjilli, të kumtohet me zell, të krijohet bindja se vlerat e tij janë pasuri, që
nuk mund të flaket, nuk mund të harrohet, nuk mund të mbytet nga asnjë lloj heshtjeje: “Në
këtë tokë fisnike, si në çdo vend, ku krishterimi la gjurmë të pashlyeshme, mund të
ndërtohet një ardhmëri vëllazërore, në bashkëpunim të ngushtë me instancat e tjera
kulturore, në atmosferën e një dialogu të sinqertë e respektues”. Nga Lisbona
– në Kova d’Iria, për t’u zhytur – theksoi Benedikti XVI – në një atmosferë misticizmi
real, në të cilin thuajse preket me dorë prania e Zojës së Bekuar. Papa u bë shtegtar,
ndërmjet shtegtarëve – shpjegoi Benedikti XVI – për t’ia besuar Nënës së Virgjër shpresat
e vuajtjet e botës, por edhe jetën e meshtarëve, atyre që ia kushtojnë zemrën-zemrës
së papërlyer të Nënës së Krishtit. E lumi i flakës së procesionit me qirinj të ndezur,
që zbritën për disa çaste qiellin në tokë, në sa mbi të dyndej errësira – e bën të
prekshme edhe forcën e fesë së një turme, që thotë në kor Rruzaren shenjte: “Kjo
lutje, aq e dashur për popullin e krishterë, gjeti në Fatima një qendër shtytëse për
Kishën e botën mbarë. “Zoja e Bardhë”, në dukjen e 13 qershorit, u tha barinjve të
vegjël: “Dëshiroj ta thoni çdo ditë Rruzaren”. Mund të themi, prandaj, se Fatima e
Rruzarja janë gati –gati fjalë sinonime”. Si e përfundoi katekizmin edhe
në gjuhë të tjera, Benedikti XVI u kujtoi besimtarëve periudhën liturgjike të Kishës,
atë të nëntëditshit të Rrëshajëve. Të rinjtë i ftoi ta pranojnë hirin e Shpirtit Shenjt;
të sëmurët, ta presin si Ngushëllues, që i ndihmon për ta shndërruar vuajtjen në dhuratë
për Zotin, në të mirë të vëllezërve; ndërsa për të sapomartuarit, urimi që jeta e
çdo familjeje të ushqehet nga zjarri i Shpirtit Shenjt, Dashuri e Zotit vetë.