Paraqitet, në Milano, përmbledhja e shkrimeve të Patrikut Kirill.
(17.05.2010 RV)"Liri e përgjegjësi: në kërkim të harmonisë. Dinjiteti i njeriut
dhe të drejtat e tij”. Ky është titulli i vëllimit, që përmbledh shkrimet e Patrikut
të Moskës dhe të të gjithë Rusive, Kirill. Libri u paraqit sot në Universitetin Katolik
të Milanos. Gjatë paraqitjes, foli kryeipeshkvi i Milanos, kardinali Dionigji Tetamanci
e, në përfundim, edhe metropoliti Hilarion, kryetar i Departamentit për marrëdhënie
me jashtë të Patriarkanës së Moskës. Vëllimi i Patrikut Kirill përmbledh fjalimet
e tij mbi temën e të drejtave të njeriut e të dinjitetit të tij të paprekshëm. Siç
shkruan në hyrje imzot Xhanfranko Ravazi, kryetar i Këshillit Papnor të Kulturës,
libri tërheq vëmendjen mbi “lindjen e ca të drejtave të reja”, që përfshijnë brenda
tyre degjenerimin e dinjitetit të vërtetë vetjak, të hyra kontrabandë si shprehje
të lirisë, që ka për kufi vetëm moskufizimin e lirisë së tjetrit”. Siç nënvizoi kardinali
Tetamanci, koncepti i lirisë perëndon shpejt, në se nuk lidhet ngushtë me konceptin
e përgjegjësisë: “Shpreha kështu, me një mikpritje plot gëzim shpirtëror, bindjen
se të gjithë së bashku mund e duhet ta vijojmë me shpresë, këtë rrugë të Kishës që,
sipas vullnetit e dëshirës së Zotit, është një Kishë e vetme e shenjte”.Tema u thellua
më tej nga don Gjuzepe Kosta, drejtor i Shtëpisë Botuese të Vatikanit, që e shtypi
vëllimin, në bashkëpunim me Shoqatën Ndërkombëtare Sofia: ideja ruse, ide e Evropës.
Pas tij folën edhe shumë të tjerë. Përmbledhjen e diskutimeve e bëri metropoliti
Hilarion, i cili vërejti se Kishën Katolike e atë Ortodokse i bashkon bashkëpunimi
në luftën ndërmjet traditës së krishterë e idelogjisë liberaliste e shekullariste.
Hilarioni shpjegoi se Patriku Kirill mbron, në vepër, vlerat morale, të përbashkëta
për të dyja traditat, e sidomos, lirinë, rrugë kryesore, në të cilën ecin ata, që
kërkojnë të vërtetën.