Impenjimi i katolikëve në politikë në qendër të mbledhjes së Këshillit Papnor për
Laikët
(17.05.2010 RV)Nga data 20 deri më 22 maj do të zhvillohet në Romë Asambleja
e 24-t e Këshillit Papnor për Laikët me temë “Dëshmitarë të Krishtit në bashkësinë
politike”. Të premten, më 21 maj, pjesëmarrësit do të takohen me Papën Benedikti XVI.
Një komunikatë e dikasterit nënvizon se Ati i Shenjtë ka shprehur mëse një herë nevojën
dhe urgjencën e impenjimit të katolikëve në jetën politike. Në fjalimin hyrës të Konferencës
V të Përgjithshme të Episkopatit Latinoamerikan, pati thënë se “Respekti për një
laicitet të shëndoshë – duke përfshirë edhe pluralizmin e qëndrimeve politike – është
thelbësor për traditën e krishterë. Nëse Kisha do të shndërrohej drejtpërdrejt në
subjekt politik, nuk do të bënte më shumë për të varfërit e për drejtësinë, por do
të bënte më pak, pasi do ta humbiste pavarësinë dhe autoritetin e saj moral, duke
u identifikuar me një linjë politike e me qëndrime të pjesshme, të diskutueshme. Kisha
– nënvizon Papa – është avokate e drejtësisë dhe e të varfërve, pikërisht sepse nuk
identifikohet as me politikanët, as me interesat e partisë…Formimi i ndërgjegjes,
mbrojtja e drejtësisë dhe e së vërtetës, edukimi i virtyteve individuale e politike
është vokacioni themelor i Kishës në këtë sektor. E laikët katolikë – shton Benedikti
XVI – duhet të jenë të vetëdijshëm për përgjegjësinë e tyre në jetën publike; duhet
të jenë të pranishëm në formimin e konsensusit të nevojshëm dhe në opozitë kundër
padrejtësive”.