FAO fillon fushatën e sensibilizimit për luftën kundër urisë

(17.05.2010 RV)FAO (Organizata Botërore e Ushqimit) filloi kësaj jave fushatën “One billion hungry” (Një miliard të uritur), me qëllim sensibilizimin e opinionit publik për luftën kundër urisë dhe rritjen e presionit mbi qeveritë, që të mbajnë premtimet e dhëna. Tashmë janë 1 miliard, personat që vuajnë nga uria, një shifër që rritet vazhdimisht, në vend që të zbresë, siç mendohej në Objektivat e mijëvjeçarit, nënshkruar në vitin 2000 nga të gjitha vendet e OKB-së. Për të firmosur peticionin e FAO-s, mjafton të shkohet në faqen e internetit të organizatës, adresa e së cilës përkon me temën e fushatës. Objektivi është të arrihet në një milion firma brenda vitit, për t’i çuar në Nju Jork, në Kombet e Bashkuara, si protestë kundër rritjes së numrit të të uriturve në botë.