Përkujtojmë sot 20 vjetorin e vdekjes së Mons. Nikollë Minit, famullitarit të katedrales
së Prizrenit
(15. 05. 2010 RV)Prifti i jashtëzakonshëm dom Nikollë Mini, lindi më 9 korrik
1924, në Ferizaj të Kosovës. Ishte më i vogli ndër katër fëmijët, që Zoti u fali prindërve,
Kolë Mini dhe Monika Kajtazi. Shumë shpejt mbeti jetim dhe iu desh të strehohej
në dyert e të afërmve. Fëmijë i mençur, jashtëzakonisht i shkathët, Nikolla tërhoqi
vëmendjen e meshtarëve vendas, që e përcollën në seminarin e Prizrenit e pastaj në
Seminarin e Shkodrës e të Zagrebit, ku kreu studimet filozofike e teologjike. U
shugurua meshtar njëherësh me Don Milorad Defarin, misionar kroat i mirënjohur ndërmjet
shqiptarëve me emrin Dom Mila, në vitin 1950. Nisi menjëherë shërbimin meshtarak kudo
e kërkoi Kisha duke ungjillëzuar e përforcuar besimtarët në fenë e Krishtit e në identitetin
kombëtar: nga Shenjtërorja e Zojës së Crnagorës në fshatin Letnicë, në fshatin Novoselë
të Gjakovës, në fshatin Bec, Zym, Velezhë e në katedralen e qytetit të Prizrenit,
ku don Nikollë Mini mbylli sytë më 15 maj 1992 në elter,ndërsa kremtonte
Eukaristinë Shenjte, Meshën shenjte, duke vulosur kështu përkushtimin themelor
ndaj Trupit Mistik të Krishtit, Kishës, për çka ishte përpjekur tërë jetën me të gjitha
energjitë. Figurë poliedrike, Monsinjor Nikollë Mini u dallua si meshtar, si ndërtues
kishash, organizator i rinisë katolike, mjeshtër i korit kishtar, predikatar e gojëtar,
publicist, autor i flepalosjes "Zani i Zojës së Crnagorës" dhe i katekizmit
me titull "Besimi katolik", themelues, bashkë me Imzot Nikë Prelën,
i revistës fetare-kulturore "Drita" e cila më vonë pati edhe shtëpinë e vet
botuese prej nga dolën shumë botime të reja. Në 20 vjetorin e vdekjes e kujtojmë
si njeri që jetoi për Zotin e me Zotin, për popullin e me popullin; si meshtar që
jetoi për Elterin e mbylli sytë në elter, duke lënë kështu gjurmë të pashlyeshme në
jetën e Kishës e të kulturës shqiptare, si model që meriton të ndiqet nga breznitë
e reja.