Simpozium në Tiranë për Nënë Terezën me rastin e 100 vjetorit të lindjes së saj
Më 15 maj 2010 në Tiranë pranë Universitetit “Zonja e Këshillit të Mirë” do të mbahet
një simpozium për Nënë Terezën e Kalkutës me rastin e 100 vjetorit të lindjes së saj.
Në simpozium do të jenë të pranishëm personalitete nga fusha fetare, politike dhe
akademike. Fjalën e mirëseardhjes e do ta mbajë Imzot Rrok Mirdita, President i Konferencës
Ipeshkvnore të Shqipërisë e cila është edhe organizuesja e këtij simpoziumi. Do të
përshëndesë simpoziumin Kryetarja e Parlamentit Znj. Jozefina Topalli dhe Nunci Apostolik
në Tiranë Imzot Ramiro Molner Ingles. Një vend të veçantë do të zënë ligjëratat
që do të mbahen për këtë rast. Atë Brian Kolodiejchuk, M.C., i cili është edhe i ngarkuari
që po ndjek çështjen e shenjtërimit të Nënë Terezës pranë Vatikanit, do të flasë rreth
viteve të saj të errësirës shpirtërore nëpërmjet letrave intime të Nënës Terezë të
cilat së shpejti do të dalin edhe në gjuhën shqipe. Më tej një motër e nënë Terezës,
motra Ancila Kërhanaj M.C. do të flasë për nënë Terezën dhe fillimet e misionit të
saj në Shqipëri. Motër Ancila e ka shoqëruar nënë Terezën në udhëtimin e saj të parë
në Shqipëri në vitin 1989 dhe në fillimet e misionit të saj në Shqipëri. Në pjesën
e dytë do të jenë ligjëratat e disa akademikëve nga trevat shqiptare. Z. Anton Serreqi
nga Shkupi do të flasë për lidhjet e nënë Terezës, që bota e quajti nënë, me vendlindjen
e saj dhe me shqiptarët. Prof. Dr. Mark Camaj, ish ambasador i Serbisë dhe Malit të
Zi në Shqipëri dhe profesor i letërsisë klasike në Universitetin e Podgoricës, do
të flasë mbi nënë Terezën në Literaturën botërore. Prof. Dr. Anton Nikë Berisha nga
Kosova, një njohës i mirë i nënë Terezës, do të flasë mbi nënë Terezën në poezinë
bashkëkohore. Në fund Atë Gazmend Tinaj si për t’i dhënë një dritë përshpirtërisë
së nënë Terezës, do të na udhëheqë nëpërmjet dy vargjeve të Biblës që kanë frymëzuar
Nënë Terezën, në kuptimin e misionit të saj. Kanë dhënë konfirmimin e tyre në
këtë takim përfaqësues të presidencës, të ambasadave të ndryshme si dhe Znj. Liri
Berisha që udhëheq edhe një fondacion me emrin e nënë Terezës. Ky është vetëm njëri
prej aktiviteteve me rastin e 100 vjetorit të Nënë Terezës. Pritet së shpejti
dalja e librit me letrat intime të Nënë Terezës dhe promovimi që do të bëhet me këtë
rast. Gjithashtu me rëndësi është edhe data 26 gusht në të cilën do të kremtohet një
meshë solemne, me një të dërguar nga Vatikani, në Katedralen e Laçit të Vaut të Dejës
e cila i është kushtuar Nënë Terezës. Po mbi këtë të dëgjojmë don Gjergj Metën
në mikrofonin e Radio Vatikanit.......