(12.05.2010 RV)Në faqet e para të gazetave portugeze, sot, ditë e dytë e shtegtimit
apostolik të Papës në Portugali, pasqyrohen, me germa të mëdha, kryesisht fjalët e
Benediktit XVI në avion, por edhe ngjarjet e djeshme në Lisbonë, përmes kronikave
të gjata, shoqëruar me fotografi të mëdha nga arritja në aeroport, tek takimi me presidentin
Këvako Silva, mesha në Terreiro do Pako e, sidomos, serenata e të rinjve para nunciaturës. “Diario
de Noticias” e titullon editorialin: “Bento XVI: Papa e lidh pedofilinë me
sekretin e tretë të Fatimës”. Gazeta vë theksin tek serenata e mbrëmshme e të rinjve,
duke botuar edhe një sërë dëshmish nga mesha e djeshme, me titullin “Papa është njeri
që, para së gjithash, beson në Zotin”. Shërbime të shumta edhe mbi masat e sigurimit
si dhe kronikat e para nga Fatima, ku Papa arriti sot pasdite. Gazeta “Informacao”
e titullon shkrimin kryesor: “Persekutimi më i madh i Kishës, lind nga mëkati brenda
Kishës”. Të shumta e të bukura fotografitë, që i shoqërojnë shkrimet për vizitën e
Papës. Në faqet e brendshme edhe një titull tjetër: “Kisha duhet të mësojë edhe një
herë pendesën e të pranojë pastrimin”. Titulli i “Jornal de Noticias” i
kushtohet gjithnjë fjalëve të Papës në avion: “Të tatëpjetat nuk do ta shkatërrojnë
Kishën”. Në faqet e brendshme, një artikull kushtuar fjalëve të Papës në ceremoninë
e mirëseardhjes: “Lindja e Republikës krijoi hapësira të reja për Kishën”. Në ‘Correio
da manhà”, bie në sy titulli “Një turmë vigane e pret Papën Bento XVII”. Shërbime
të shumta kushtuar fjalëve të Atit të Shenjtë në avion e, sidomos titulli: “Armiku
është brenda në Kishë”. Së fundi, e përditshmja “Il Pùbblico” e titullon
editorialin “Papa u kërkon katolikëve më shumë impenjim në politikë dhe në ekonomi”.
Të shumtë artikujt kushtuar shtegtarëve, që po arrijnë grupe-grupe në këmbë, në
Fatima, për takimin me Papën.