Մայրերու Օրը։ Մեր ամէնէն շատ սիրած էակին գեղեցիկ տօնն է այսօր։ Գարնանային ծաղկման
եւ բնութեան զարթնումին հետ միասին կը հասնի նաեւ բարի, պայծառ եւ լուսաւոր տօն մը՝ Մայրերու
Օրը։
Բոլոր ժողովուրդները եւ ազգերը իրենց սովորութիւններով կը մեծարեն Մայրը։
Ահա հասած է այդ օրը։ Իրականութեան մէջ ամէն օր մեզի համար մայրերու Օր է, որովհետեւ
ամէն օր կը սիրենք եւ կը գուրգուրանք իրենց: Սակայն Մայիսի երկրորդ Կիրակին պաշտօնապէս
նշանակուած է տօնակատարութեան համար: Ամէն մարդ այդ օրուան ուրախութեամբ եւ անձկութեամբ
կը սպասէ։ Նուէրներու մասին կը մտածեն եւ լաւագոյնս տօնելու համար շատ ծրագիրներ կը մշակեն։
Ուրեմն ի՞նչ ընենք այդ օրը: Ահաւասիկ ձեզի առաջարկներու շարք մը, որ վստահաբար պիտի նպաստէ
ձեր ծրագիրներուն իրագործման եւ լաւագոյն Մայրերու Օրը տօնելու համար։
1- Իրագործեցէ՛ք
«արտասովոր» արձակուրդ մը: Կրնաք կարգ մը պարզ կարգադրութիւններով հայկական համ ու հոտով
պտոյտ մը կազմակերպել, ուր ներկայ են հայկական ճաշատեսակները, երգն ու պարը: Մօտակայ
հանրային պարտէզ մը, ուր կարելի է երկինքին տակ հայկական տոհմիկ օր մը ապրիլ։
2-
Կարելի է ստեղծել տնային շարժապատկերի մթնոլորտ, դիտելով մայրիկին հետ ունեցած ձեր հին
պատկերները: Անոնք կրնան հաճելի յիշատակներ արթնցնել ձեր մէջ:
3- Ընտանիքին կեանքին
մէջ գտէք ծիծաղաշարժ երեւոյթներ ու դէպքեր: Երեկոն միասին անցնելով, փորձեցէք վերյիշել
եւ գրի առնել ընտանեկան կեանքէն ներս գոնէ անցնող տարուան ընթացքին տեղի ունեցած ծիծաղաշարժ
ու հաճելի երեւոյթներն ու պատահարները: Այսպիսով երջանիկ պահեր պարգեւած կ՛ըլլաք ձեր
մայրիկին:
4- Երաժշտութեամբ պայծառացուցէք ձեր ընտանեկան մթնոլորտը: Երաժշտութեան
կախարդող ներգործութիւնը ամբողջութեամբ պիտի թարմացնէ ձեր եւ ձեր մայրիկին տրամադրութիւնը:
Քանի մը տարեկան երեխաները կրնան իրենց գիտցած երգերը իրենց գիտցած ձեւով երգել մայրիկին
համար՝ թռիչք պարգեւելով անոր հոգիին:
5- Մայրերու Օրը շատ իմաստալից կ՛ըլլայ
ամուսինին եւ զաւակներուն կողմէն կնոջ կամ մօր պարգեւել այն ինչ, որուն կարիքը ունի:
Ցանկը երկար է, բայց կարելի է յիշել հետեւեալները.-
* Մայրիկին ազատ ժամանակ պարգեւել:
*
Առաւօտեան մինչեւ ուշ ժամերը քնանալու առիթ ստեղծել մայրիկին:
* Որեւէ բան, որուն կարիքը ունի մայրիկը՝
ձեր կարծիքով:
6- Ծաղիկներ ցանեցէք կամ նոյնիսկ ծառ տնկեցէք ձեր մայրիկին համար:
Եթէ ձեր տունը օժտուած է պարտէզով, կարելի է այդ օրը մայրիկին սիրած ծաղիկի տեսակը ցանել:
Կարելի է նոյնիսկ ծառ մը տնկել եւ յետագային անոր տուած իւրաքանչիւր պտուղին հետ անգամ
մը եւս յիշել կամ պատուել մայրիկը: Պարտէզին մէջ երեխաները կրնան քաղցր խօսքեր գրել մայրիկին՝
հողին վրայ:
7- Մայրերը իրենց կարգին կրնան նախաձեռնել հետեւեալը: Հաւաքեցէք երեխաները
եւ իւրաքանչիւրին ձեռքերն ու ոտքերը թաթխեցէք ոչ-թունաւոր այլազան գոյներով ներկերու
մէջ, ապա թելադրեցէք իրենց, որ գունաւոր ձեռքերն ու ոտքերը դրոշմեն մեծ պաստառի մը վրայ:
Իւրաքանչիւրը կրնայ իր դրոշմներուն կողքին բարի մաղթանք մը գրել մայրիկին: Եթէ նման բան
մը ընէք յաջորդ տարի եւս, պիտի տեսնէք, թէ կարգ մը ձեռքեր եւ ոտքեր որքա՜ն մեծցած են:
8-
Օրուան պատշաճ բացիկի մը մէջ՝ բանաստեղծութիւն մը նուիրեցէք ձեր մայրիկին:
9-
Վերջապէս ինչպէ՞ս կարելի է երեւակայել մայրերու օր առանց ամուր «փաթթուկներու» կամ տաքուկ
եւ համովիկ «պաչիկներու»: