Betohen 30 alabardierë të rinj të Rojes Zvicerane në Vatikan
(06.05.2010 RV)Sot, Roja Zvicerane
Papnore kujtoi flijimin e 147 ushtarëve të vet, rënë gjatë “Plaçkitjes së Romës”,
më 6 maj 1527, duke mbrojtur Papën Klementi VII nga sulmi i lancikenekëve, ushtarëve
mercenarë gjermanë. Po sot, u betuan edhe ushtarët e rinj të Rojes Zvicerane. Kremtimet
u hapën dje, me Mbrëmësoret në Kishën e Zojës në Rrëmaj, të kryesuara nga ipeshkvi
i San Galos, imzot Markus Byhel. Ndërsa dita e sotme filloi me meshën e kryesuar nga
Sekretari i Shtetit të Vatikanit, kardinali Tarçizio Bertone në Elterin e Katedrës
së Bazilikës së Shën Pjetrit në Vatikan. Më pas u nderuan të rënët dhe u vendos një
kurorë dafinash në monumentin përkujtimor në Oborrin e Shën Damasit. Zv.sekretari
i Shtetit, imzot Fernando Filoni u dha medalje e tituj nderi disa prej anëtarëve të
Korpit të Rojeve Zvicerane. Pasdite, në orën 17.00 u mbajt ceremonia e betimit
të rojeve të reja dhe e zv.komandatit të ri, majorit Uiliam Kloter. Konfederata helvetike
u përfaqësua nga Presidentja e Këshillit Federal, Doris Lojthard, e cila paradite
u prit në audiencë nga Papa Benedikti XVI. Ishin të pranishëm ambasadorë e anëtarë
të Trupit Diplomatik të akredituar pranë Selisë së Shenjtë. Manifestimet do të përfundojnë
nesër, me një koncert të bandës muzikore të Uzvilit, që do të ekzekutohet në Oborrin
e Shën Damasit në orën 16.30. Alabardierëve të rinj, kardinali Tarçizio Bertone
u kujtoi sot paradite, gjatë Meshës: “Roja Zvicerane Papnore karakterizohet
nga gatishmëria e anëtarëve të saj për t’u vënë në shërbim të Papës, për t’u kujdesur
për mbrojtjen e tij të veçantë; është një vullnet që ju – të dashur alabardierë –
keni shprehur si të krishterë, pra të motivuar nga dashuria për Krishtin e për Kishën.
Jemi të mbledhur në këtë kremtim eukaristik për t’i thënë faleminderit Zotit për bujarinë
tuaj”. Por cila është mënyra e betimit të rojeve zvicerane dhe elementet e
tij? Pyetëm kapelanin e tyre, atë Alan dë Remì: Kemi fillimisht flamurin: rekruti
shkon tek flamuri dhe e merr me dorën e majtë. Mbi flamur është stema e Xhulit II,
themeluesit të Rojeve; është stema e Papës aktual; është stema e komandantit dhe janë
edhe ngjyrat e familjes së Mediçëve nga ku vinte Klementi VII, shpëtuar nga Rojet
Zvicerane. Pastaj ngrihet dora e djathtë drejt qiellit me tre gishta të hapur, që
personifikojnë Trininë Shenjte.