Britania e Madhe voton nesër, në një sfidë treshe, pa siguri për asnjë prej partive
(05.05.2010 RV)Britania e Madhe voton nesër për zgjedhjet politike më të pasigurta
të historisë së saj moderne. Rritja e konsensusit për liberaldemokratët ka krijuar
dyshime për fitoren e konservatorëve të Dejvid Kamerunit, e cila vetëm pak javë më
parë as që diskutohej. Për laburistët, kryeministri Gordon Braun dhe ish-kryeministri
Toni Bler kërkojnë që simpatizantët të mos bëjnë llogari, por të japin sa më shumë
vota për partinë. Nga sondazhet shihet qartë se njerëzit janë të pavendosur
dhe se ka mundësi ta zgjedhin kandidatin në minutin e fundit. Konservatorët mund të
fitojnë më shumë vende në parlament se sa laburistët dhe liberaldemokratët, por jo
aq sa u duhet për të qeverisur pa probleme.