Vizita “ad Limina” e ipeshkvijve të Belgjikës: çështjet etike e morale ndër temat
kryesore të bisedave në Vatikan
(04.05.2010 RV)Ipeshkvijtë e Belgjikës
filluan dje vizitën e tyre “ad Limina” në Vatikan. Të shumta janë argumentat e bisedave
të tyre me Papën dhe bashkëpunëtorët e tij të Kuries Romake, që do të vazhdojnë deri
të shtunën. Ndër aspektet më të rëndësishme, çështja e abuzimeve me të miturit nga
ana e disa eksponentëve të klerit, siç sqaron në mikrofonin tonë, kryetari i Konferencës
Ipeshkvnore Belge, imzot André-Mutien Jozef Leonar: Sigurisht, do të prekim
çështjet e dhimbshme në vendin tonë, pas dorëheqjes së ipeshkvit të Bryzh. Të flasim
për këtë temë dhe për masat që kemi ndërmend të marrim për të përballuar situatën
është e pashmangshme. Pastaj, do të flasim pa dyshim edhe për sfidat e shekullarizimit
dhe për çështje bioetike, që në Belgjikë janë veçanërisht të rëndësishme, sidomos
përsa i përket eutanazisë. Më tej, dialogu ndërfetar, meqë jemi një vend ku emigracioni
nga shtetet islamike është i madh. E nuk mungon edhe problemi i thirrjeve: gjendja
në Belgjikë është veçanërisht e rëndë, më shumë se në Francë. Si reagon shoqëria
para fjalëve të Kishës për jetën e familjen? Sot, reagimi është me paragjykime
dhe negativ: ekziston një lloj mosbesimi, dyshimi, por kur jepet rasti për të shpjeguar
drejtpërdrejt qëndrimin e Kishës mbi këto tema, vërejmë se mesazhi kuptohet mirë.
Shumica e njerëzve e njeh Kishën nga parrullat, nga thjeshtëzimet e titujt e gazetave.
Cila është gjendja shëndetësore e katolicizmit në Belgjikë? Dimë se katolikët,
që shkojnë në kishë, janë në rënie… Praktika është reduktuar shumë. Gjendemi
para një situate shekullarizimi të theksuar e, kjo vlen për të gjithë vendin, ndoshta
më pak në Flandër. Gjëja e parë është ta kuptojmë këtë situatë. Kisha në Belgjikë
ka pasur shumë për të thënë në të kaluarën, ndoshta pak si tepër nga një pozicion
force e, duhet të pranojmë se kjo situatë nuk ekziston më. Sot, jemi një zë ndër të
tjerët, një zë i rëndësishëm, por një ndër të tjerët. Sot, duhet të inkurajojmë përpjekjet
për të formuar bashkësi të zjarrta të krishtera, me ata që duan ta bëjnë, me njerëz
të bindur. Belgjika po përjeton një krizë të re politike. Si e shihni të ardhmen
e vendit? Kisha duhet të jetë shumë e kujdesshme kur flitet për çështje politike.
Personalisht, jam i bindur se Belgjika mund ta kapërcejë këtë krizë, duhet të jemi
realistë. Vendi nuk mund të ndahet. Belgjika nuk është shumë e madhe, është e paimagjinueshme
të hyjë në një aventurë separatiste. Besoj se do të shkohet drejt një sistemi edhe
më federalist, por uniteti i vendit do të ruhet.