Atë Lombardi shpjegon udhëtimin e Papës në Portugali: në gjurmët e Zojës së Fatimës
(04.05.2010 RV)Sot paradite, në
Sallën e Shtypit të Vatikanit, drejtori i saj, atë Federiko Lombardi u shpjegoi gazetarëve
programin e udhëtimit apostolik të Benediktit XVI në Portugali, në 10-vjetorin e lumnimit
të barinjve të Fatimës, Jaçinta e Françesku. Vizita e 15-të ndërkombëtare e Papës
do të bëhet nga 11 deri më 14 maj. Ati i Shenjtë do të vizitojë shenjtëroren mariane
të Fatimës, kryeqytetin Lisbona dhe qytetin e Portos. Benedikti XVI është papa
i tretë, që do të shkojë në Fatima, pas Palit VI dhe Gjon Palit II. Në vitin 2000,
kujtoi atë Lombardi, kur u bë e njohur pjesa e tretë e Sekretit të Fatimës, qe pikërisht
kardinali i atëhershëm Jozef Racinger, ai që bëri komentin teologjik të dokumentit.
Fatima pra, është shumë e rëndësishme për Papën: “Një shenjtërore mariane,
ku ka pasur ngjarje, me të cilat Benedikti XVI është marrë thellësisht, personalisht,
edhe nga pikpamja e teologjisë dhe e përshpirtërisë. E natyrisht, Fatima është vendi
ku vështrimi përfshin edhe meditimin mbi historinë”. Sapo të mbërrijë në shenjtërore,
pasditen e 12 majit, Papa do të kujtojë paraardhësin e tij, Gjon Palin II dhe atentatin
kundër Papës Vojtila më 13 maj 1981. Por, megjithëse Fatima do të jetë zemra e udhëtimit,
vizita e Atit të Shenjtë përfshin krejt kombin portugez. Prandaj, do të ketë aktivitete
të rëndësishme në Lisbonë dhe në Porto. Atë Lombardi vuri në dukje temën e udhëtimit:
“Sëbashku me ty, ecim me shpresë”. Për t’iu përgjigjur kësaj kërkese për shpresë,
Papa do të takohet me botën e kulturës, me anëtarët e klerit dhe me veprimtarët e
Baritorisë shoqërore të Kishës. Gjithashtu, Benediktit XVI do t’i dorëzohen çelësat
e qytetit të Lisbonës, me rastin e Meshës që do të kremtojë atje më 11 maj.