Mbledhja e tretë përgatitore për Sinodin e Lindjes së Mesme
(03.05.2010 RV)Në Romë, është mbajtur mbledhja e tretë e Këshillit për Lindjen
e Mesme, në përgatitje për Sinodin, që do të zhvillohet në Vatikan nga 10 deri më
24 tetorin e ardhshëm. Kisha në Lindjen e Mesme, thuhet në deklaratën e sekretarisë
së përgjithshme të Sinodit të Ipeshkvijve, pavarësisht nga vështirësitë aktuale, ka
besim në të ardhmen në paqe, në drejtësi e në bashkëpunim me hebrenjtë e myslimanët,
për të mirën e të gjithë banorëve të zonës. Në mbledhjen e 23-24 prillit u diskutua
gjerësisht për argumentet, që do të përmbahen në “Instrumentum Laboris”, ku përcaktohet
tematika e sinodit. “Objektivi i Asamblesë së veçantë për Lindjen e Mesme – lexohet
në notë – është i dyfishtë: të konfirmojë e të përforcojë identitetin e të krishterëve
përmes Fjalës së Zotit dhe Sakramenteve dhe, të përtërijë bashkimin ndërmjet Kishave
të veçanta, që ato të ofrojnë dëshmi të vërtetë të krishterë, në kontakt me Kisha
e bashkësi të tjera kishtare. Që këtej, urgjenca e impenjimit ekumenik”. “Sinodi
i ardhshëm – vazhdon dokumenti – do të jetë rast i çmuar për të shqyrtuar deri në
fund edhe gjendjen fetare e shoqërore, për t’u dhënë të krishterëve një vizion të
qartë se ç’do të thotë të jenë dëshmitarë aktivë të Krishtit, në kontekstin e një
shoqërie me shumicë myslimane. Do të reflektohet mbi gjendjen aktuale, jo të lehtë,
për shkak të konflikteve dhe paqëndrueshmërisë, që shkaktojnë eksodin e popullsisë,
duke përfshirë edhe jo pak të krishterë”.