(29.04.2010 RV)Të dashur dëgjues, të dielën e ardhshme, Papa Benedikti XVI
shkon për vizitë në Torino, ku prej ditësh është ekspozuar Sindona, apo çarçafi me
të cilin është mbështjellë Krishti pas vdekjes. Ajo që na bën më shumë përshtypje,
kur shohim Sindonën, është fytyra e stampuar në negativ, që na bën të mendojmë e të
përfytyrojmë fytyrën e Zotit tonë Jezu Krisht. Por cili është përdorimi i fjalës
“fytyrë” e ç’kuptim merr ajo për të krishterët? Për këtë do të flasim sot.
Është
interesant fakti se në hebraisht, shprehja “para dikujt” thuhet “lipnê”,
që e ka kuptimin “para fytyrës së dikujt”.“Panîm”, “fytyra” e një personi,
është në hebraisht një fjalë në numrin shumës, që nxjerr në pah kompleksitetin e një
fytyre, e cila nuk është thjesht lëkurë, organe, mish e gjak, por një shenjë e rëndësishme
shprehëse e komunikimi. Kjo është arsyeja, që shpesh në Bibël, fytyra tregon botën
e brendshme të një personi, siç ndodh, për shembull, në rastin e Kainit, që e ka zili
të vëllain, Abelin: “Kaini u zemërua për së tepërmi dhe u çart në fytyrë” (Zan
4,5). Ose siç i ndodh pozitivisht Anës, nënës së ardhshme të profetit Samuel: pasi
dëgjoi Elinë meshtar t’i thotë se Zoti do t’ia plotësonte dëshirën për të pasur fëmijë,
“fytyra e saj nuk qe më si më parë” (1 Sam 1,18). Por, vëmendja jonë,
gjatë gjithë jetës, përqendrohet në një fytyrë të mistershme e të lavdishme, në fytyrën
e Zotit. Pikërisht për faktin se fytyra përcakton vetë personin, kuptohet lehtë
se pse “shikimi i fytyrës hyjnore” ishte e ndaluar dhe e pamundur për njeriun,
madje, mendohej se nuk mund të mbijetoje pas një përvoje të tillë. Domethënëse për
këtë është reagimi i Isaisë profet, në ditën që dëgjon thirrjen e Hyjit: “I mjeri
unë, qetash sharrova, sepse jam njeri me buzë të papastra… e me sy të mi e pashë Mbretin,
Zotin e ushtrive!” (6,5). Edhe Moisiut, i cili fliste me Zotin si me një mik të
vetin, nuk iu lejua të shihte fytyrën e Zotit e kërkesës së tij, Hyji iu përgjigj
kështu: “Nuk do të mund ta shikosh fytyrën time, sepse njeriu nuk mund të më shohë
mua e të mbetet në jetë… Do të ma shikosh shpinën: porse fytyra ime nuk mund të shihet”
(Dal 33,20.23). Megjithatë në Bibël, përmes mënyrës simbolike për të folur
mbi Zotin (antropomorfizëm), ne i njohim sytë e Zotit që kontrollojnë njerëzit, gojën
që na çon fjalë e mesazhe, veshët që dëgjojnë, e madje edhe hundën që shfryn nga zemërimi.
Në Librin e Psalmeve, dalëngadalë përvijohet ideja e mundësisë për “ta parë fytyrën
e Zotit”, kur hyhet për lutje ne tempull (Ps 11,7; 17,15; 42,3). Po ashtu, siç
thuhet në Librin e Numrave (6,25-26), fytyra e Zotit, që shkëlqen mbi popullin e vet,
është shenjë lumturie dhe mbrojtjeje: “Të ndriçoftë Zoti me fytyrën e vet e pastë
mëshirë për ty. E sjelltë Zoti fytyrën e vet drejt teje e ta dhëntë paqen”. Besimtarët
konsiderohen pikërisht si “ata që kërkojnë fytyrën e Zotit” (shih Ps 24,6; 27,8-9),
ndërsa në ditën e mëkatit e të gjykimit, thuhet se “Zoti e fsheh fytyrën e vet”
(shih Lp 31,17; Ez 39,23). Në këtë kundërshti ndërmjet misterit të fytyrës
hyjnore dhe zbulimit e kundrimit të saj qëndron lidhja ndërmjet trashendencës së Zotit
dhe imanencës së Tij, ose ndërmjet ekzistencës së Hyjit si qenie e ndryshme dhe superiore
në krahasim me njeriun dhe, njëkohësisht, ekzistencës si person që vepron, flet, ndërhyn
në histori, duke e zbuluar veten si shpëtimtar. Natyrisht, kulmi i takimit të Zotit
me njeriun arrihet nga Krishti, që është Biri i Zotit, “shkëlqimi i Lavdisë dhe
vula e qënies së Hyjit” (Heb 1,3), por njëkohësisht, është edhe Jezusi i Nazaretit
me një fytyrë njerëzore, që mund të njihet e të shihet. Vetëm në këtë dritë, arrijmë
të kuptojmë frazën e Shën Gjonit Ungjilltar: “Hyjin kurrë askush nuk e pa: Biri
i vetëm që është Hyj, një natyre me Atin, Ai bëri të njihet” (1,18).