Thirrje e ipeshkvijve amerikanë për çarmatimin bërthamor
(28.04.2010 RV)Pas marrëveshjes mbi reduktimin e armëve bërthamore, nënshkruar
nga presidenti amerikan, Barak Obama dhe kreu i shtetit rus, Dmitrij Medvjedjev, janë
të nevojshme hapa të tjera për ta çliruar botën nga ky kërcënim i jashtëzakonshëm
për jetën njerëzore. Kështu pohoi kryeipeshkvi i Baltimorës, imzot Eduin Fredrik O’Brajën,
duke rinovuar të hënën e kaluar thirrjen e prelatëve amerikanë drejtuar senatorëve,
me rastin e seminarit të politikës ndërkombëtare në Universitetin Katolik të Amerikës.
Episkopati i SHBA-ve ka botuar dy letra, që kanë të bëjnë me çarmatimin bërthamor.
Quhen “Sfida e paqes” dhe “Korret drejtësi kur mbillet paqe”. Në to theksohet se eliminimi
i arsenaleve bërthamore është më shumë se një ide morale, duhet të kthehet në objektiv
politik. Përdorimi i armëve bërthamore si mjet frikësimi, pavarësisht nga impenjimi
për të mos i përdorur, krijon një ekuilibër shumë të brishtë e nuk mund të jetë bazë
për paqen. Duke pranuar se rruga drejt çarmatimit të plotë bërthamor është e gjatë
dhe e vështirë, ipeshkvijtë amerikanë vënë në dukje se paqja e vërtetë, për të cilën
ka nevojë bota, mund të ndërtohet vetëm mbi themelet e drejtësisë e të mbrojtjes së
të drejtave njerëzore, si edhe mbi solidaritetin e ndërsjelltë.