Shenime historike mbi Shêjtnoren e Zojës së Shkodrës përpunue nga
Willy Kamsi
Shqipnia, për hir të vendosjes së saj, ka qenë ndër shekuj
pikë takimi e ndeshjesh ndërmjet kombesh e kulturash të ndryshme. Vendosja e saj gjeopolitike
ka përcaktue situata me karakter politik e kulturor, tue pasë qenë qysh në lashtësí
kalim i detyrueshëm i Lindjes drejt Prendimit dhe anasjelltas, për hir edhe të ndërtimit
gjeologjik të brigjeve të saja, të rrafshta e me ranishta të pafund. Për ket arsye
ka marrë, përçue e rrezatue kulturë në caqet e Adriatikut e të Ballkanit. Zhvillimi
i Shqipnisë, qysh nga epoka klasike ilire, deri në prak të pushtimit turk, pasqyronte
nji zhvillim që nuk kishte gjâ mangut kundrejt përparimit të vendeve kufitare, dhe
që në disa rasa kapërcehej në mënyrë të shkëlqyeshme, në pikëpamje teologjike, kulturore,
shkencore e juridike, prej përfaqësuesve mâ në shęj të fisit të vet. Qysh në zanafillë,
krishtenimi e ka vulosë praninë e vet në tokën shqiptare me anën e veprës së nji Apostulli
të madh, Shën Palit, i cili në shtegtimet e veta, që përfunduen me martirizimin e
tij në Romë, përhapte ndër ilirë mësimet e Jezu Krishtit. Krishtenimi, i përndjekun
prej nji vargu perandorësh romakë, mbas gati tre shekujsh, do të lulëzonte përsëri,
derisa t'u bante, mbas shpalljes s'Ediktit të Konstantinit, fé shtetnore. Krishtenimi
ka qenë, dhe kjo duhet të nënvizohet, e vetmja fé e pranueme në Shqipní kundër vullnetit
të pushtuesit. Për të gjatë mesjetës në qytetet e saja, për hir edhe të marrëdhanieve
tregtare që lulëzojshin me vendet bregdetare të Mesdheut, nji zhvillim të spikatun
patën shkencat humanistike, sidomos në qytetet e Veriut të Shqipnisë, të drejtueme
me statute të veta, si Shkodra, Drîshti, Tivari, Ulqini, Lezhja e Durrësi. Sa personalitete
me vlerë u jepshin shkëlqim e autoritet universiteteve të bregut italian të Adriatikut,
ndër të cilat shquhej ai i Padovës, tue lanë nji gjurmë të pashlyeshme me praninë
e tyne, përgatitjen e kulturën humanistike. Kjo vlen edhe për bregun dalmatin. Emna
si ai i Barlecit, i Beçikemit, i Tomeut ose i Gazullit e të kaq të tjerëve, qenë lavdi
i këtyne universiteteve. Duhet vű në dukje se pranë Universitetit të Padovës, Tomeu
pat dishepull të vetin Nikollë Kopernikun në zâ, ndërsa prifti shkodran Marin Barleci,
historian e humanist, botonte në vjetët e para të `500, përveç nji kronike të rrethimit
të parë të Shkodrës nga ana e turqve (1474), prej të cilit këta u tërhoqën me turp,
nji biografí historike të Heroit tonë Kombtar, Gjergj Kastriotit-Skanderbegut, dhe
nji vepër mbi papë e perandorë. Të gjitha, simbas traditës humanistike, të shkrueme
latinisht, lingua universalis e asaj kohe, dhe që Erazmi prej Roterdami e cilësonte
si të vetmen gjuhë kulture. Në ketë frymë kulture, tradite e historie pati zhvillimin
e vet Shkodra, nji ndër qytetet mâ të randësishme të pellgut të Adriatikut: «nji qytet
që ka hy në histori me shęjet e fisnikisë e të pushtetit që ja kanë dhanë qytetnimet
e njimbasnjishme të Europës jug-lindore». Shkodra mesjetare mblidhej te rranza e kodrës
së kështjellës «Rozafa», e cila sundonte e shtrinte shikimin e vet në fushën Mbi-
e Nënshkodër, në nji pozicion të përkryem në pikëpamje strategjike, e mbrojtun prej
shpatit thik të kodrës e prej lumejve, që rrjedhin në dý anë të saja. Kisha e kuvende,
simbas fjalës së Barlecit e të dokumentave që i dishmojnë në arkivat e Venedikut,
Raguzhës e të Vatikanit, e mbushin qytetin mbi e nën kodër. Dëshmí që ka mbetë e vetme,
sepse burimet dokumentare vendase qenë shkatrrue në gati pesëqind vjetët e sundimit
barbar turk. Në shekullin xv, në qytet e mbi kodër, do të kujtojmë: kishën e Sh'Nëkollit,
të Shën Aponalit, të të gjithë Shęjtënve, si dhe të Shën Teodorit e të Shęjtes Krygjë.
E mandej Sh'na Vlashi (kisha e tregtarëve të Raguzhës, e shndërrueme në hamam dhe
e shkatrrueme në fillim të vjetëve '60), Sh'Illia, kisha katedrale e Shën Shtjefnit
(e fundit të shekullit xiii, e stilit romanik-gotik), kisha famullitare e Sh'Nëkollit
dhe ajo e Sh'Mërisë së Shkodrës. Kurse në afërsí të qytetit, në Dęjë, nji tjetër kishë
kushtue Sh'Mërisë, e vetmja e stilit romanik-gotik që pat mbërrijtë shëndosh mbas
500 vjetëve shkatrrimi turk, nji xhevahir i vërtetë arti, e cila qe hjedhë në erë
me dinamit gjatë të ashtuquejtunit «revolucion kultural» komunist. Në Shirq kemi rrenojat
e nji kishe të të njajtit stil e periudhe ndërtimore, atę të Shęjtënve Shirgj e Baht,
mbrenda rrethit të nji monastiri të lashtë benediktin, prej të cilit nuk duken mâ
as gjurmët në sipërfaqe. Kah fundi i shekullit xiv u dukën për herë të parë në
tokën shqiptare urditë turke, të cilat i kishin thirrë feudalët shqiptarë në grindjet
e tyne të mjera. Të verbuem prej egoizmit nuk e kuptuen fatkeqësinë e madhe, që po
i shkaktojshin kombit të vet. Me 1467, nji vjetë para vdekjes së Gjergj Kastriotit-Skanderbegut,
prania e turqve në trollin shqiptar po shtohej dita-ditës. Kjo praní shoqnohej me
rrenimin e plotë të fshateve e të fushave, me kerdinë e popullit të pambrojtun.. Prej
kështjellës, që sundonte qytetin mesjetar, shiheshin fshatet krejt flakë, të cilat
diftojshin përparimin e akinxijve turq. Në vjetin 1467 ndodhi diçka me randësí
për Kishën e për popullin shqiptar. Âsht vjeta kur, si rrjedhim i nji inkursioni turk,
qyteti qe braktisë e qytetarët u bartën mbi kodër, mbrenda kështjellës, ku jetuen
deri kur, me 1479, merguen në Venedik. Âsht vjeta kur në traditën e Shkodrës kujtohet
shpërngulja e Fugures Shęjte të Zojës së Këshillit të Mirë. Âsht vjeta kur fugurja
shfaqej në Gjenacan, e shoqnueme prej dy shkodranëve, Gjergji e Shkjau (Giorgi e De
Sclavis). Mbasi venedikasit ja patën dorëzue Shkodrën turqve, me nënshkrimin e
traktatit të paqes të 25 janarit 1479, nuk qe mâ e mundun me pasë lajme që të provojshin
shpërnguljen e Fugures Shęjte dhe traditën e lidhun me `tę në Shkodër. Ipeshkvi
Dillon vrén se «nji ngjarje me nji shenj paralajmues kaq fatzí, duhet të ketë depërtue
thellë në zemrat e Shqiptarëve të mjerë, që nuk kishin mundësí të mergojshin», kurse
«ata që nuk ndigjuen me mohue fenë e të parëve, do të kenë marrë në nënshtrimin e
vet gjykimin e drejtë të Perendisë për vendin e tyne, dhe prandej janë lidhë mâ ngusht
përreth fesë së vet». Prandej nuk qe e mundun për nji kohë të gjatë me pasë lajme
të sakta rreth traditës vendase shqiptare, në lidhje me shpërnguljen: Ishte e pamundun,
sepse të gjithë të huejt shiheshin me dyshim. Kah gjysma e shekullit xviii diçka lëvizi,
dhe pati disa hapa prej ane së njerëzve që mund të jepshin njoftime mâ të hollësishme. Relacioni
i parë qe dërgue prej Kontit e Kapidanit Stefano Medin me 25 korrik 1745, Giovanni
Battista Medin-it. Aty dishmohet prania në Shkodër e nji kishe të rrenueme kushtue
«Shęjtes Nuncjatë», e cila bante mrekullí, ndër `to edhe përpjekje të ndryshme e të
kota për me e kthye në xhamí. Ndërsa, për sa dihet prej traditës, disa banorë të qytetit
të Shkodrës thoshin se kjo Fugure Shęjte kishte qenë bartë, e disa të tjerë pohojshin
se ishte nisë vedi. Mbas dý vjetësh, me 1747, gjindej në Romë, në Kishën e Aracoelit,
në të cilën po kremtohej Tetëshja për kanonizimin e Shën Pjetrit Regalato, Kola i
Ndoc Kamsit, «fisnik i Qytetit të Shkodrës, e Provanik i nandë Kishëve, që gjinden
në afërsí të Qytetit të sipërthanun për Misionarët Papnorë, dhe Ipeshkvijt e dërguem
prej Kongregatës Shęjte të Propaganda Fide». N'atë vjet, tue mos dijtë italishten,
nuk mujti me kumtue drejtpërdrejt dishminë e vet dhe kjo kje bâ prej abatit Dom Gaspër
Curri, që kryente detyrën e përkthyesit dhe që shoqnonte Kolë Kamsin. Me 9 fruer 1748
Kola i Ndoc Kamsit, tue e pasë mësue në mënyrë të mjaftueshme italishten, lëshoi nji
dishmí në të cilën përsëritte çka kishte deklarue me 1747. Mâ vonë kemi të tjera
dishmí, ndër të cilat ajo e Atit Giampiero da Bergamo O.M. Prefekt Papnor i Misioneve
të Kastratit e i Parë i Kuvendit të Françeskanëve të këtij qyteti, e 16 korrikut 1878,
që jep nji përshkrim interesant dhe të hollësishëm të rrenojave të kishës. Nji hollësí
për t'u vrejtë âsht zgavra që si përmasa ju përgjegjte atyne të pikturës së nderueme
dhe që gjindet në Gjenacan. Ndërsa dy dritore të nji kthine «kanë arkitrenë me hark
të mprehtë të stilit gotik». Me këtę provohet se stili dhe koha e ndërtimit, para
pushtimit turk, kanë qenë të gjashme me ata të katedrales së Shën Shtjefnit e të kishave
të Sh. Shirgj e Baht e të Sh'Mërisë. Në ketë dokument shenjohet dyndja aty, jo vetëm
e besimtarëve katolikë, por madjč edhe të vetë myslimanëve «për me pasë përfitime
shpirtnore e shekullore». Ky relacion kje hartue prej Atit Mariano da Palmanova
O.M., nënshkrue prej anëtarëve të komisionit dhe legalizue nënshkrimet e tyne prej
Argjipeshkvit të Tivarit e Shkodrës, Imz Karl Pooten. Me 17 dhetor 1878, Imz. Engjëll
Radoja, lëshonte nji tjetër dishmí me randësí në lidhje me vendosjen e kishës, të
quejtun kishëz, në të cilën gjindej «Fugurja e Zojës së Shkodrës – Fuguria e Zois
Sckoders». «Me të vërtetë kjo Kishëz, si sot, si atëherë, gjindej në njenën ndër lagjet
e jashtme, të quejtun qysh prej vjetve të parë të vershimit të tmershëm të turqve
– Ali-Begh-Mahâlasi. Kjo lagje, sot gjashtëdhetë vjet, ishte plot me shtëpia e banorë
të gjithë Myslimanë». Kjo, sepse në atë kohë katolikët e kishin të ndalueme rreptësisht
që të banojshin në qytet. Dishmia e Imz. Radojës na jep, përveç kësaj, njoftime
interesante, prej të cilave disa pasqyrojnë atę që thotë tradita mbas rrethimit të
1478-79. «Turqit…, posa u banë të zotët e Shkodrës, mâ keq se vandalët, prishën mbishkrimet
e shenjat që do të kujtojshin Fenë e Krishtenë, dhe dogjën librat e gjanat e tjera
shkencore e fetare»:Përveç kësaj vijon tue pohue se «Nuk âsht e vërtetë mandej me
pohue se të krishtenët me pushtimin turk ose i ranë mohit fesë, ose ata që deshën
me qindrue në fé u strehuen ndër male ose ikën në Italí. Kjo dihet për disa, por jo
për të gjithë. Shumë sish patën leje me banue në Zus, Tebuenë, Berdicë, Kuç e Rrmanj,
vende shumë afër qytetit». Gjendja fetare në Shqipní gjatë pushtimit osman ishte
bâ e padurueshme. Kah fillimi i shekullit xviii, përfundue `600-shi, shekulli
i apostazisë së madhe, përpara nji vargu parregullsísh të vrejtuna në Kishën Shqiptare,
kler e besimtarë të asaj kohe, u bâ e detyrueshme mbledhja e Kuvendit të Parë të Arbënit
në Merqinjë, pranë Lezhe, me 1703. Ketë kuvend e ndoqën edhe dy të tjerë: i dyti (1871)
dhe i treti (1895). Të dy, të mbledhun në Shkodër, parashtrojnë e pasqyrojnë rishtas
të gjitha ato parregullsí të kundrueme në Kuvendin e parë. Këto parregullsí duhet
t'u shkruhen ndër të tjera edhe vështirësive që i paraqiteshin Kishës, ndër të cilat
korrupsioni i autoriteteve turke dhe pengesat e shtimuna ndërmjet që të mos rregullohej
gjithçka shkonte kundër shestimeve të Kishës. Gjithashtu, Kuvendi i Tretë (1895) propozoi
si mbrojtëse e pajtore të Shqipnisë Virgjinen Nanë të Këshillit të Mirë, e njohun
përgjithësisht si Zoja e Shkodrës. Ky vendim u mor njizani dhe iu parashtrue Atit
të Shęjt, Papës Leonit xiii, papa i Rerum Novarum, dhe jo vetëm mori pëlqimin, por
përveç kësaj kje shpallë 26 Prilli si ditë kremtje për dioqezet e Shqipnisë. Tue
kenë se gjatë pushtimit turk nuk ishte i lejuem në mënyrë të preme rindërtimi i kishave
të rrenueme gjatë shekujve, aq mâ pak zbatimi i punimeve për meremetimin e tyne, u
desh të mbërrihej deri mbas pavarësisë së Shqipnisë prej zgjedhës turke (28 Nandor
1912) për me nisë rindërtimin e Shęjtnores së kushtueme së nderuemes Zojë të Shkodrës. Pikërisht
me 1917, në kulm të Luftës së Parë Botnore, qenë nisë punimet. Me 23-26 prill 1917,
u kremtue me madhështí 450 vjetori i shpërnguljes prej Shkodre i Fugures Shęjte. Në
atë rasë morën pjesë në kremtim Argjipeshkvi i Shkodrës, Imz. Jak Serreqi, Argjipeshkvi
i Durrësit, Imz. Prend Bjanku, Ipeshkvijtë e Lezhës e të Zadrimës, Imz. Luigj Bumçi
e Imz. Gjergj Koleci. Ishin të pranishëm, përveç autoriteteve vendase, Kryekomandanti
i Korparmatës xix austro-hungareze, Gjenerali Ignatius Trollmann, G. v. Bolberitz,
Konsulli i Përgjithshëm August Ritter von Kral, i cili gjatë Luftës së Parë Botnore
zente kambën e Komisarit Civil në Shqipní dhe Konsulli Karl Halla. Për me gazmue
gjithçka ndihmuen banda ushtarake austriake, ajo qytetse dhe Schola Cantorum e katedrales
së Shkodrës. Për rindërtimin ndihmuen njizani e me zemërgjanësí populli i Shkodrës
dhe i fshateve të Arkidioqezës. Përveç ipeshkvijve, klerit e autoriteteve qytetse
dhe krejt popullit, u bashkuen në mënyrë kuptimplote teologët shqiptarë pranë Universitetit
të Innsbruck-ut në Austrí, të cilët me anën e nji fushate në shtypin austriak mbërrijtën
me mbledhë nji shumë të randësishme. Toka mbi të cilën gjindeshin germadhat e shęjtnores
së lashtë, mbi nji sipërfaqe prej 10.262 m2 me nji vlerë 7.500 koronash
austriake, i dhurohej prej Komandës së Naltë të Korparmatës xix austriake, Argjipeshkvisë
së Shkodrës. Për me ligjësue ketë akt, qe hartue nji dokument pronësie që, me 7 korrik
1917, i qe dorëzue Argjipeshkvit të Shkodrës, Imz. Jak Serreqit. Qe hapi i parë. Mâ
vonë, me 31 korrik, qe bekue guri i parë, ndërsa me 17 gusht, në praninë e Argjipeshkvit
të Shkodrës, të Baroneshës Mari, bashkëshorte e Gjeneralit Trollmann dhe të nji numri
të madh oficerësh, vetë Gjenerali, zbriti në gropën e themeleve, vendosi gurin e parë
me nji pergamenë mbrendë, dhe mbasi shtroi llaçin, me nji mistrí të vogël, pati përgëzimet
dhe falënderimet e Imz. Argjipeshkvit për zellin e treguem për rindërtimin e Shęjtnores
së Zojës së Këshillit të Mirë. Me 1944 erdhën kohë të zymta për Kishën dhe Kombin
shqiptar. Shteti komunist, marksist-leninist e prandej ateist, u sul me furí kundër
gjithçka përfaqësonte katoliçizmin në Shqipní. Qenë shkatrrue institucionet fetare,
shkollat, plaçkitë bibliotekat, muzetë dhe të gjitha veprat kulturore që ishin zhvillue
në Shqipní prej Kishës, e cila mbante parësinë e plotë në ketë fushë qysh prej mesjetës
dhe mâ përpara. Dhe Shkodra, qendër e katoliçizmit, qe qyteti mâ i përndjekun me vrasjen
në masë të meshtarëve e të shekullarëve, vetëm për besnikinë e tyne kundrejt besimit
të vet fetar dhe parimeve të krishtena. Kurse me «revolucionin kultural» të tipit
kinez, përndjekja fetare mbërrinte kulmin e vet me mbylljen e të gjitha kishave, shkatrrimin
e tyne ose shndërrimin në pallate sporti ose në depo shtetnore. N'atë rasë i erdhi
radha Shęjtnores së Zojës së Këshillit të Mirë, që të pësonte barbarizmin «kultural».
Përveç se u rrafshue ndërtesa, qenë nxjerrë mbetjet e Argjipeshkvit të Shkodrës, Jak
Serreqit, i vorruem mbrenda kishës, dhe tretë në lumin që rrjedh aty pranë. Ashtu
si patën bâ me mbetjet e Poetit tonë Kombtar, Atit Gjergj Fisha O.F.M. Me kthimin
e ligjshmënisë në Shqipní, me shembjen e regjimit komunist dhe vendosjen e demokracisë
kaq të pritun, filloi nji punë e vijueshme dhe e dendun për me rindërtue gjithçka
mund të shpëtohej. Shumë u paraqitën për rindërtimin e kishave, kusht paraprak për
rindërtimin e ndërgjegjeve, të damtueme randë prej nji ideologjie shterpe si ishte
marksizëm-leninizmi. Do të rilindte edhe Shęjtnorja e Zojës së Shkodrës. Me projekt
e përmasa të njajta, si kishte qenë para shembjes. Dhe erdh dita e lumë. Ati i
Shenjtë Gjon Pali II, në prak të vizitës historike në Shqipní, që posa kishte pështue
prej komunizmit, shkonte në Gjenacan për me nderue Fugurën e Zojës së Këshillit të
Mirë. Kur erdh në Shkodër bekoi gurin e parë për rindërtimin e dytë të Shęjtnores.
Kjo ndodhte me 25 Prill 1993, ditë kur populli shqiptar në tanësinë e vet, pa dallime,
myslimanë, ortodoksë e katolikë kishte vershue ndër rrugë e sheshe të qyteteve për
me pritë, me mikpritjen e vet tradicionale e me zemër të pastër, Mikun e Madh të Shqipnisë
e të Shqiptarëve. Qysh me 10 mars 1991, kur zente fill shembja e regjimit orlig
komunist, shqiptarja Nanë Terezae Kalkutës, mbasi kishte marrë lejen, të mohueme kaq
e kaq herë kur desh të shihte, endč gjallë, nanën e motrën e vet, kishte ardhë për
vizitë në Atdheun e vet e ulej me u lutë mbi rrenojat e Shęjtnores së Virgjines Nanë
të Këshillit të Mirë. Ky vend i shenjtë kulti pati për mecenat nji shqiptar të
mergimit historik, ruejtës i traditave kombtare e shpirtnore të zanafillës së vet,
Imzot Simeone Duca, pasardhës i merituem i Kolonisë së Arbëneshit (Borgo Erizzo) të
Zarës, koloní shqiptarësh që, në shekullin xviii, e mirëpritun prej Republikës së
Venedikut, zuni vend në lagjen që prej Fisnikut Erizzo mori emnin. Populli shqiptar
shprehë mirënjohjen e vet kundrejt Imzotit Duca dhe e falënderon, tue i pasë kthye
ky kultit, me zemërgjanësinë që e dallon, njenën ndër shęjtnoret e mëdhaja që gjinden
në dheun e Shqipnisë, objekt i nji përshpirtnie të përvujtë e të flakët, jo vetëm
për katolikët, por edhe për besimet e tjera që janë në Shqipní. Si përfundim na
duket se, për nji Shęjtnore të shkatrrueme në rasa të ndryshme e të rindërtueme mandej,
të jenë kuptimplote fjalët e Tęnëzot drejtue Sh'Pjetrit: "et portae inferi non
praevalebunt" Tetor 1997