Ամենապատիւ եւ Գերերջանիկ Տ Տ Ներսէս Պետրոս ԺԹ Տանն Կիլիկիոյ կաթողիկէ Հայոց կաթողիկոս
Պատրիարքը կը ստանայ Հայաստանի Հանրապետութեան քաղաքացիութիւն։
Հինգշաբթի 22 Ապրիլ 2010-ին,
երեկոյեան ժամը 18:30-ին, Հռոմի Լեւոնեան Քահանայապետական Հայ Վարժարան ժամանեց Հայաստանի
Հանրապետութեան ներքին գործոց նախարար՝ Պր. Ալիք Սարգսեան եւ անոր շքախումբը, ընկերակցութեամբ՝
Իտալիոյ մօտ Հ Հ արտակարգ եւ լիազօր դեսպան` Պր. Ռուբէն Կարապետեանին: Նախարար Ալիք
Սարգսեան եւ անոր շքախումբը նախ այցելեցին Ս. Նիկողայոս Թոլենդինացի եկեղեցին, ապա ուղղուեցան
դէպի վարժարանին դահլիճը, ուր՝ հիւրընկալուեցան Ամենապատիւ եւ Գերերջանիկ Տէր Ներսէս
Պետրոս ԺԹ. կաթողիկոս պատրիարքի կողմէ: Սոյն պաշտօնական այցելութեան ընթացքին, հայրենի
նախարարը Ամենապատիւ Հոգեւոր Տիրոջ շնորհեց ՜՜Հայաստանի Հանրապետութեան քաղաքացիութիւն
եւ քաղաքացիական անձնագիր՝՝: Ամենապատիւ Հոգեւոր Տէրը դառնալով Հայաստանի Հանրապետութեան
քաղաքացի, Ս. Գիրքին վրայ երդում կատարեց ՜՜պահպանել Հայաստանի Հանրապետութեան Սահմանադրութիւնը
եւ օրէնքները, պաշտպանել Հայաստանի Հանրապետութեան անկախութիւնը եւ տարածքային ամբողջականութիւնը՝՝:
Ուխտեց նաեւ ՜՜յարգել պետական լեզուն, ազգային մշակոյթը եւ սովորութիւնները՝՝: Այս առթիւ,
Պր. Նախարարը Հոգեւոր Տիրոջ նուիրեց նաեւ երեք լեզուներով՝ հայերէն, ռուսերէն եւ անգլերէն
պատկերազարդ գիրք-ալբոմ մը՝ «Հայաստան» անունով: Ան նուիրեց նաեւ Հայաստանի տեսարժան
վայրերը պատկերացնող նկար- շրջանակ մը, «Սա է Հայաստան» պատրաստուած DVD մը, Հ Հ ոստիկանութեան
10-ամեակի առիթով պատրաստուած գինի, ինչպէս նաեւ շքանաշան մը, որուն վրայ քանդակուած
են Հայաստանի Առաքելական երեք գլխաւոր եկեղեցիները՝ Էջմիածին, Հրիփսիմէ եւ Շողակաթ: Հոգեւոր
Տէրը իր երախտագիտական զգացումները արտայայտեց Հայաստանի Հանրապետութեան Նախագահին, յանձին
Պր. Ալիք Սարգսեանի, եւ հրաւէր ուղղեց Պր. նախարարին այցելելու՝ Զմմառու Արծիւեան Միաբանութեան
հնաշէն Վանքը, անոր թանգարանը, մատենադարանը եւ ձեռագրատունը: Ապա Պր. Նախարարին յանձնեց
Հայաստանի քրիստոնէացման 1700 ամեակի շքանշանը: Արարողութենէն ետք, բոլոր ներկաները ուղղուեցան
դէպի Վարժարանին սեղանատունը, ուր իրենց ի պատիւ ընթրիք մը սարքուած էր: