Kreu i OKB-së në Kosovë i shqetësuar nga mundësia e rritjes së tensioneve në veri
(22.4.2010 RV)Misioni i Kombeve të Bashkuara në Kosovë "mbetet në një pozicion
unik" për të lehtësuar dialogun mes bashkësive etnike, thuhet në raportin e Sekretarit
të Përgjithshëm Ban ki Mun. "Vazhdimi i mbështetjes për aktivitetet e UNMIK ut nga
bashkësitë etnike në terren, nga Prishtina e Beogradi, si dhe nga Këshilli i Sigurimit
dhe bashkësia ndërkombëtare në përgjithësi ka një rëndësi themelore", thekson në raportin
e radhës për Kosovën, Ban ki Mun. "Qëllimi strategjik i UNMIK ut mbetet çuarja
përpara e sigurisë, qëndrueshmërisë dhe respektimit për të drejtat e njeriut, përmes
përfshirjes në dialog të të gjitha bashkësive etnike në Kosovë, të Prishtinës, Beogradit
si dhe të aktorëve rajonalë e ndërkombëtarë", theksohet në raport. Më tej dokumenti
nënvizon se "qëndrueshmëria afatgjatë dhe zhvillimi i Kosovës e rajonit lidhet me
një proces të suksesshëm pajtimi mes bashkësive". Raporti nënvizon se nuk ka pasur
rritje të numrit të incidenteve, përfshi dhe ato që lidhen me pakicat, krahasuar me
raportin paraprak. Kreu i OKB-së i bën thirrje Qeverisë së Kosovës për kujdes ndaj
zbatimit të strategjisë për veriun e vendit, duke thënë se ajo "ka nxitur reagime
nga të gjitha palët dhe i ka dhënë një dinamikë diskutimeve" për këtë çështje. "Jam
i shqetësuar nga mundësia e rritjes së tensioneve në veri të Kosovës poqese autoritetet
e Prishtinës nuk e zbatojnë strategjinë e tyre në mënyrë transparente, në dialog me
komunitetet lokale dhe me palët e tjera relevante", pohon ai, duke vënë në pah se
në "strategjinë për veriun", autoritetet e Kosovës nuk kanë konsultuar UNMIK-un. (nga
Kosova.com)