Kryeministri Shqipërisë Berisha takon ministrin e Jashtëm të Kosovës,Hyseni
(20.4.2010 RV)Kryeministri Sali Berisha vlerësoi sot, se "Kosova po konsolidohet
gjithnjë e më shumë si një faktor thelbësor paqeje dhe stabiliteti në Ballkan".
Sipas zyrës së shtypit pranë kryeministrisë, Kryeministri Berisha në takimin me ministrin
e Jashtëm të Kosovës, Skënder Hyseni vlerësoi arritjet e mëdha të Kosovës.
"Zgjedhjet e fundit lokale në Kosovë dhe në veçanti, pjesëmarrja e komunitetit serb
në këto zgjedhje dëshmuan edhe një herë nivelin e lartë të standardeve demokratike
të arritura në Kosovë", tha Kryeministri Berisha. Ai tha se "është e rëndësishme
që të dy vendet të ndërmarrin hapat për studimin e fizibilitetit për një projekt të
dytë madhor që do të zgjeronte lidhjet midis tyre, por edhe mbarë rajonin, ndërtimin
e linjës hekurudhore midis dy vendeve". Nga ana e tij, Ministri Hyseni vlerësoi
kontributin e qeverisë shqiptare për gjithçka që ka bërë për Kosovën. Ai informoi
Kryeministrin Berisha për fillimin e punimeve në pjesën e rrugës së kombit që kalon
në Kosovë dhe e falënderoi edhe një herë për kontributin e tij për realizimin e veprës
madhore të kombit, rrugës Durrës-Kukës-Morinë. "Dorëzimi i përgjigjeve të
pyetësorit të Komisionit Evropian për Shqipërinë është një akt për të cilin jemi të
gjithë krenar", tha z. Hyseni, duke e cilësuar këtë një ngjarje historike e madhore
për Shqipërinë, por edhe për mbarë kombin shqiptar. Në takim u diskutua për
zgjerimin e bashkëpunimit mes dy vendeve në të gjitha fushat, në veçanti për promovimin
e mëtejshëm të shkëmbimeve ekonomike, tregtare, kulturore, në fushën e energjisë si
dhe bashkëpunimit rajonal dhe në kuadër të integrimit evropian dhe atë euroatlantik.