Papa, Universitetit Katolik: edukimi duhet të jetë në shërbim të njeriut.
(19.04.2010 RV)Universiteti duhet të jetë një mjedis shpirtëror e kulturor,
që impenjohet për të bërë kërkime shkencore e për t’i zhvilluar dhuratat e botës së
krijuar: kështu shkruan Papa në një mesazh, nënshkruar nga Sekretari i Shtetit të
Vatikanit, kardinali Tarçizio Bertone, me rastin e Ditës së 86-të të Universitetit
Katolik të ‘Zemrës së Krishtit’, që u kremtua në Itali. Në tekstin drejtuar kardinalit
Dionigji Tetamanci, drejtor i Institutit Toniolo për studime të larta, nënvizohet
kuptimi dhe roli i Universitetit Katolik në edukimin e breznive të reja. Një edukim
– shkruhet më pas në mesazh – që duhet vënë gjithnjë në shërbim të njeriut, me aftësi
të vërteta e të thella shkencore. Progresi i vërtetë – nënvizon Papa në mesazh – kërkon
gatishmëri për ballafaqim e dialog, gjë që i hap horizonte të reja mendjes e dëshmon
fekonditetin e pasur të trashëgimisë fetare. Kërkon, pra, vërtetësi, thënë me dashuri,
që identiteti i krishterë të depërtojë në jetën e përditshme të njeriut.