Nunci Apostolik në Maltë mbi shtegtimin e Papës Benedikti XVI në ishull
(15.04.2010 RV)Të shtunën, Papa Benedikti XVI do të shkojë për dy ditë në Maltë,
me rastin e 1950-vjetorit të shpëtimit të Shën Palit Apostull nga mbytja. “Është një
privilegj” komenton për agjensinë katolike ZENIT, Nunci Apostolik në Maltë, imzot
Tomazo Kaputo. “Është shtegtim në zanafillën e fesë, që bëhet në prag të 5-vjetorit
të zgjedhjes së Benediktit XVI në Katedrën e Shën Pjetrit. Një përkim domethënës dhe
providencial”. Malta është tokë apostolike e në këtë kuptim, shpjegon Nunci, është
një hallkë e rëndësishme e dëshmisë së krishterë, që fillon pikërisht me Apostujt.
Jehona e Vitit Paolin ndihet akoma e tani, edhe përvjetori i mbytjes së anijes së
Apostullit të Popujve. Papa vjen për ta ndihmuar Kishën dhe shoqërinë malteze të reflektojnë
mbi këto kohë shndërrimesh, me ritme më të shpejta këtu, se në vende të tjera. Vjen,
të kërkojmë sëbashku rrugët më të drejta e më të përshtatshme për t’iu përgjigjur
sfidave të kohëve të reja. Vizita është përgatitur mirë si nga ana e Kishës, ashtu
edhe nga ana e shtetit. Marrëdhëniet ndërmjet tyre, thekson imzot Kaputo për agjensinë
ZENIT, kanë qenë gjithnjë shumë të mira e jo thjesht formale. Malta është e pasur
me institucione edukative dhe asistenciale. Mund të thuhet se është “toka e bamirësisë”.
Shpesh në bazën e kësaj përhapjeje të jashtëzakonshme, qëndron bashkëpunimi ndërmjet
bashkësisë kishtare dhe asaj civile. Urdhëri kishtar i Maltës është pikë referimi,
e jo vetëm për Ishullin. Nuk duhet harruar se feja katolike njihet këtu si fe shtetërore
dhe është traditë tashmë, që presidentët e republikës, në fillim dhe në mbarim të
mandatit, të shkojnë në audiencë tek Ati i Shenjtë. Më pas, Nunci Apostolik përshkruan
rolin që ka Malta në Bashkimin Evropian dhe kontributin e saj në përçimin e vlerave
e të rrënjëve të krishtera. Ishulli është vërtet i vogël, në krahasim me vende të
tjera, por pesha e tij historike është e madhe. Vetë Benedikti XVI vjen këtu në gjurmët
e Shën Palit, shpjegon imzot Kaputo, gjë që konfirmon identitetin e lashtë të krishterë
të Maltës, dëshmia e të cilit vazhdon edhe sot, ndoshta i ndihmuar nga pozicioni gjeografik
i ishullit. Malta është natyrshëm tokë mikpritëse, dialogu e bashkëjetese paqësore
ndërmjet popujve e kulturave të ndryshme. Në këtë kuptim, jo vetëm Malta, por të gjitha
vendet e Mesdheut, thekson në përfundim Nunci Apostolik, mund të luajnë një rol të
rëndësishëm si ura për të globalizuar edhe vlerat e jo vetëm tregjet.