Siguri më e madhe bërthamore në botë. Marrëveshje në Uashington mes 47 vendeve.
(14.04.2010 RV)Ndërsa bashkësia ndërkombëtare diskuton mbi sanksionet e mundshme
kundër programit atomik të Iranit, Republika islamike denoncon zyrtarisht në OKB për
shantazh, presidentin amerikan Barak Obama. Ky i fundit ishte dje protagonisti kryesor
i marrëveshjes së arritur ndërmjet 47 vendeve, që morën pjesë në Takimin mbi sigurinë
bërthamore në Uashington, organizuar nga Shtëpia e Bardhë. Në dokumentin përfundimtar,
parashikohen kontrolle më të mëdha për materialin bërthamor, që mund të përdoret për
bomba, si edhe luftë kundër trafikut klandestin të uraniumit dhe plutoniumit. Uashingtoni
dhe Moska dhanë dje shembullin personal, duke nënshkruar një marrëveshje, me të cilën
impenjohen të zvogëlojnë sasinë e plutoniumit për qëllime ushtarake deri në 34 ton
për çdo vend. E Rusia deklaroi se do të mbyllë impiantin e fundit për prodhimin e
plutoniumit. Takimi i ardhshëm do të bëhet pas dy vjetësh në Korenë e Jugut, mesazh
i qartë për Korenë e Veriut, e cila është një hap nga prodhimi i bombës atomike. A
janë të realizueshme impenjimet e marra? Të dëgjojmë opinionin e një eksperti italian
të energjisë bërthamore, Xhorxho Alba: Është një objektiv
i realizueshëm, ambicioz. Në veçanti, dëshiroj të vë në dukje se të njëjtat veprimtari
për sigurimin e materialeve bërthamore dhe të gjitha impenjimet e tjera që dolën nga
Takimi, përkojnë me hapat e nevojshme për një botë të lirë nga armët bërthamore. Ekziston
rreziku që grupe tërroristësh të zotërojnë armë bërthamore? Pyetëm pedagogun e Marrëdhënieve
Ndërkombëtare në Universitetin e Padovës, Antonio Papiska: Rreziku është real
dhe natyrisht është rritur gjatë viteve të fundit. Këshilli i Sigurimit i OKB-së është
i vetëdijshëm për këtë. Në prill të vitit 2004 miratoi rezolutën 1540, kushtuar temës
së armatimit bërthamor, për të parandaluar rënien e armëve bërthamore e të shkatërrimit
në masë në duart e terroristëve, të kriminelëve e të personave të tjerë jo shtetërorë.
Rreziku është rritur, pasi terrorizmi është përhapur, strukturuar dhe ka mjete të
rëndësishme, falë edhe tenologjisë. Prandaj është i nevojshëm plani i punës, që u
përcaktua në Takim. Një pjesë e impenjimeve ka të bëjë me bashkëpunimin ndërkombëtar,
pjesa tjetër me atë që duhet të bëjnë shtetet në shtëpinë e tyre për sigurinë bërthamore.