Koncert homazh në Tiranë në 100 vjetorin e lindjes së Lumes Nënë Terezë
(13.4.2010 RV)Një koncert homazh hapi siparin e aktiviteteve në kuadër të 100
vjetorit të Lindjes të bamirëses me origjinë shqiptare, Nënë Terezës. Ministria
e Turizmit, Kulturës Rinisë dhe Sporteve të Shqipërisë (MTKRS) në bashkëpunim me Fondacionin
'Nënë Tereza' dhe nën kujdesin e Kryeministrit Sali Berisha, organizuan dje në mbrëmje
në mjediset e Akademisë së Arteve një koncert homazh në kujtim të Nënë Terezës.
Të pranishëm ishin dhe Ministri i MTKRS, Ferdinand Xhaferraj, Presidentja e fondacionit
"Fëmijët Shqiptarë", Zj, Liri Berisha, shefi i delegacionit të Komisionit Europian,
Helmut Lohan, Kreu i OSBE-së në Shqipëri, Robert Bosch, personalitet te politikës,
kulturës dhe artit në Shqipëri, etj. Koncerti që përmbante pjesë të kompozitorëve
Giovanni Battista Pergolesi, Tomaso Albinoni dhe këngë popullore qytetare shqiptare,
do të vijojë më pas në qytetet Shkodër, Lezhë, Korçë, Ulqin, Prishtinë, Shkup.
Me pjesëmarrjen e korit "Nënë Tereza " dhe Orkestrës së Harqeve me dirigjente Suzana
Turkun, u prezantua për artdashësit kryeqytetas kryevepra e literaturës botërore,
"Stabat Mater" e kompozitorit italian Giovanni Battista Pergolesi, vepër premierë.
Kori "Nënë Tereza" interpretoi pjesë si Stabat mater dolorosa, Cuius animam gementem,
Quist se homo, Quando corpus morietur, Eja, mater fons amoris, etj. Në koncertin-
homazh në nder të ikonës së humanizmit dhe paqes në Botë erdhi dhe një buqetë këngësh
shqiptare, si "Lule borë", "Si dukat i vogël je", "N'at zaman të asaj furie", "Kroi
i fshatit tonë", etj, që u interpretuan nga Kori Nënë Tereza. Ministri i MTKRS,
Ferdinand Xhaferraj bëri të njohur aktivitetet për nder të Nënë Terezës, duke thënë
se "viti 2010 do të jetë viti i Nënë Terezës", i shpallur i tillë në kuadër të 100-vjetorit
të lindjes së shenjtores, e njohur për zemërgjerësi, bujari, guxim, aftësi të posaçme
për kryerjen e punëve më të rënda, ajo do ti kushtohej shërbimit ndaj më të varfërve,
ndërmjet të varfërve, gjë që e kreu me besnikëri. Ministri Xhaferraj shpalosi
listën e aktiviteteve që do të zhvillohen për të nderuar ikonën unikale të humanizmit
dhe paqes botërore dhe theksoi mes të tjerave, se "të gjitha aktivitetet kanë si synim
nderimin, respektin dhe të bëjnë të njohur origjinën shqiptare dhe dashurinë, që Nënë
Tereza ushqente për Shqipërinë dhe shqiptarët". Përgjatë gjithë vitit do të
ketë panaire, ekspozita, filma dokumentar, konferenca shkencore dhe vënien në skenë
të një drame nga Teatri Kombëtar për Nënë Terezën. Në ditën e përkujtimit të lumturimit
të saj në Vatikan në 19 Tetor, 2003, në kryeqytetin tonë në Tiranë do të organizohet
Festivali Ndërkombëtar i Koreve me pjesëmarrjen e koreve nga vende të Evropës.