(11.4.2010 RV)Të dielën dytë të Pashkëve, Kisha kremton edhe festa e Mëshirës
Hyjnore. Siç dihet, kulti i Mëshirës Hyjnore mbetet i lidhur ngushtë me figurën e
rregulltares mistike polake, Faustina Kovalska, lindur në fillim të shekullit të kaluar
e vdekur në moshën 33 vjeçe, më 1938. Sot përshpirtëria e rregulltares polake, lartuar
në nderimet e elterit nga Papa Gjon Pali II, është përhapur në shumë vise të botës. Po
çka i kujton njerëzimit e Diela e Mëshirës Hyjnore? Themelimi i së
Dielës së Mëshirës Hyjnore nga Shërbëtori i Zotit, Gjon Pali II, duhet vlerësuar si
dhuratë e madhe për Kishën e për mbarë njerëzimin. Kjo e Dielë i krijon Kishës mundësinë
t’ia kumtojë botës mëshirën e Zotit e t’i flasë për madhështinë e saj të pambaruar.
Përhapja e jashtëzakonshme e kultit të Mëshirës Hyjnore, që nga beatifikimi i
motrës Faustina më 18 prill '93, tek kanonizimi i saj më 30 prill 2000, buron nga
nevoja që ka çdo njeri për Mëshirën Hyjnore, sepse - siç thotë Papa Gjon Pali II -
ku tjetër, përveçse në Mëshirën Hyjnore, mund të gjejnë strehë e shpresë njeriu e
bota? Po kush ishte Shën Faustina Kovalska? Shën Faustina është
dhuratë e Zotit për kohën tonë, është dhuratë e trojeve të Polonisë për mbarë Kishën.
Jezusi i besoi mistikes polake detyrën t’ia përcillte mbarë njerëzimit mesazhin e
mëshirës Hyjnore. Misioni i motër Faustinës na kujton të vërtetën mbi Mëshirën Hyjnore,
sepse e dimë që ajo është një e vërtetë e zbuluar në Shkrimin Shenjt. Motër Faustina
na e kujton këtë të vërtetë në forma të reja, që i janë transmetuar nga vetë Jezusi
gjatë dukjeve të tij. Mendojmë sidomos për nderimin e figurës së mëshirës Hyjnore,
që vjen nga vegimi i 22 shkurtit 1931. Pastaj për orën e Mëshirës, që ia kërkoi vetë
Jezusi, për lutjen që Krishti ia mësoi motër Faustinës që t’ ia drejtonte Mëshirës
së tij Hyjnore. Mendojmë, pastaj, për festën e Mëshirës Hyjnore, themeluar nga Papa
Gjon Pali II gjatë kanonizimit të Motrës Faustina, që Kisha e kremton si "E Diela
e Mëshirës Hyjnore". Mendojmë edhe për përhapjen këtij kulti, që sot vijon përmes
atyre që quhen "apostujt e Mëshirës Hyjnore".
E derisa kremtojmë këtë festë,
t’i kujtojmë fjalët e Benediktit XVI shqiptuar pesë vite më parë gjatë lutjes së Mbretëreshës
Qiellore në Vatikan, kushtuar kultit të Mëshirës Hyjnore. Më atë rast, Ati i Shenjtë
Racinger u ndal tek kujtimi i shenjave të kryqëzimit të cilat, sipas tregimit të Shën
Gjonit ungjilltar, dalloheshin qartë në Korpin e lumturuar të Krishtit: “Këto plagë
të shenjta, ndër duar, ndër këmbë e në kraharuar, janë burim i pashtershëm feje, shprese
e dashurie për të gjithë, posaçërisht për shpirtrat që kanë më shumë etje për Mëshirën
Hyjnore – tha Papa Racinger e në vijim shpjegoi se pikërisht prej këndej u frymëzua
edhe Gjon Pali II i cili, duke vlerësuar përvojën shpirtërore të rregulltares së përvujtë,
motrës Faustina Kovalska, shprehu dëshirën që e Diela pas Pashkëve t’i kushtohej në
mënyrë të veçantë Mëshirës Hyjnore.
E Provania Hyjnore deshi që Papa Wojtila
t’i mbyllte sytë për dritën e kësaj toke pikërisht natën e kësaj feste. Misteri i
dashurisë përdëllyese ishte gjithnjë në qendër të papnisë së Tij – nënvizoi Benedikti
XVI - duke kujtuar më pas edhe Enciklikën Dives in misericordia si dhe fjalët e shqiptuara
nga Papa Wojltila ditën e shugurimit të Shenjtërores së Mëshirës Hyjnore në Krakovi,
më 17 gusht të vitit 2002: “Sa nevojë ka bota e sotme për Mëshirën Hyjnore”, duke
vënë kështu në dukje se kulti i Mëshirës Hyjnore nuk është devocion i dorës së dytë,
por përmasë e fesë dhe e lutjes të të krishterit.