Solidaritet për Papën Benedikti XVI. Deklaratë e Zëdhënësit të Vatikanit për ish-ipeshkvin
e Trondhaimit.
(07.04.2010 RV)Kisha shtrëngohet rreth Bariut të vet. Nga e gjithë bota ipeshkvij,
meshtarë e njerëz të thjeshtë i shprehin solidaritetin e tyre Benediktit XVI në atmosferën
e fushatës, filluar nga mediat kundër tij, për shkak të abuzimeve seksuale të disa
eksponentëve të klerit katolik. Jo më larg se dje, Sekretari i Shtetit të Vatikanit,
kardinali Tarçizio Bertone, i cili ndodhet në Kili, pranë popullsisë së dëmtuar nga
tërmeti, hodhi poshtë të gjitha akuzat, që shohin në Papën personin që “dinte, por
nuk ndërhyri”, për të shpëtuar fasadën e jashtme të Kishës. Për rastin e priftit pedofil
amerikan Murphy, kardinal Bertone deklaroi në aeroportin e Santiagos, se Vatikani
ka dokumentuar të kundërtën e asaj që thonë mediat e Kisha ka reaguar menjëherë. E
mbështeti, kryeipeshkvi i Santiagos, kardinali Fransisko Havier Erràzuriz. Solidaritet
edhe nga kardinali Anxhelo Sodano, dekan i kolegjit kardinalor, i cili, nga faqet
e gazetës vatikanase “L’Osservatore Romano”, thekson se Papa mishëron të vërteta morale,
që nuk pranohen nga bota, e cila për këtë përdor fajet e meshtarëve si armë kundër
Kishës dhe mësimeve të saj. Sodano vëren se gjithnjë Kisha ka qenë në qendër të sulmeve:
fillimisht betejat e modernizmit kundër Papës Piu X, pastaj ofensiva kundër Piut XII
për sjelljen e tij gjatë Luftës II Botërore e së fundi, kundër Palit VI për enciklikën
“Humanae Vitae”. Nuk ka faj Papa, thekson kardinali, nëse ndonjë nga meshtarët katolikë
njolloset me krime të rënda, siç është abuzimi me fëmijët. Kryeipeshkvi i Uashingtonit,
imzot Donald Uerl e shprehu solidaritetin e tij me Papën në një letër të hapur drejtuar
besimtarëve të dioqezës. Prelati kujton se kardinali i atëhershëm Racinger përdori
dorën e fortë për çrrënjosjen e shkandullit të pedofilisë në Kishën amerikane. Sot,
zëdhënësi i Vatikanit, atë Federiko Lombardi konfirmoi lajmin e dhënë nga Administratori
Apostolik i Trondhajmit në Norvegji, për rastin e ish-ipeshkvit të vendit, i akuzuar
për abuzim seksual në dëm të një fëmije, që tani është 30 vjeç. Autoritetet kishtare
janë njohur me rastin në janar 2009 e menjëherë ipeshkvi është detyruar të japë dorëheqjen,
t’i nënshtrohet terapisë mjekësore dhe të mos marrë pjesë në asnjë aktivitet baritor.
Për imzot Georg Myler flitet tani, pasi viktima ka dëshiruar gjithnjë të mbetet anonime.