(07.04.2010 RV)Banka e Shqipërisë dhe kryeministri i vendit, Sali Berisha bëjnë
deklarata të kundërta për zhvillimin ekonomik. Gjatë vitit 2009, sipas guvernatorit
të Bankës së Shqipërisë, Ardian Fullani, aktiviteti ekonomik ka pësuar rënie. Në veçanti,
është zvogëluar volumi i mallrave që eksportohet, janë pakësuar të ardhurat e emigrantëve
në vend, duke cënuar kështu besimin tek institucionet financiare. Kreditë me probleme
janë rritur nga 6,4% në 10,4% , ndërsa borxhi publik i Shqipërisë përbën 59,5% të
Prodhimit të Brendshëm Brut. Jo i të njëjtit mendim, kryeministri Sali Berisha, i
cili në paraqitjen e projektligjit për hedhjen në treg të 300 milion euro bono thesari,
deklaroi se ekonomia është “në gjendje entuziaste, e pacënuar nga cunami financiar”.