Në Jeruzalem Pashkët kremtohen me gëzim nga banorët vendas e shtegtarët
(04.04.2010 RV)Në Jeruzalem që dje nisi të jehonte Alleluja. Çast tejet prekës,
atje ku u ngjall Jezusi e ku vijojnë lutjet për paqe në Tokën Shenjte. Kremtimi
i parë i Pashkëve të Zotit u ndoq në zemër të Qytetit të Shenjtë, pikërisht atje,
ku Krishti u ngjall, në Anastasis, siç e quajnë grekët. Liturgjia solemne, sipas ritit
romak, filloi në këmbët e Kalvarit, me bekimin e zjarrit të ri, me lutjen mbi qiriun
e Pashkëve, me tetë leximet në gjuhën latine dhe me shpalljen e Ungjillit para Varrit
të të Ngjallurit. Kumti i Ngjalljes tundi harqet e bazilikës madhështore pak para
orës 6.30 me orën vendase. Bazilika e Ringjalljes, për arsye të statukuo, gëzon të
drejtën ta kremtojë e para fitoren e jetës mbi vdekjen. E kryesuar nga patriku i Jeruzalemit
të Latinëve, imzot Fuad Tual, Nata pa gjumë e Pashkëve u kremtua rreth elterit, ku
ruhet relikja e varrit të vërtetë, të zbrazët, të Zotit. Morën pjesë rreth 200
besimtarë, që arritën të shoqëruar nga policia. Qyteti i Vjetër është plot me ortodoksë,
shumica të ardhur nga Greqia e nga Evropa lindore, të cilët po marrin pjesë në të
gjitha kremtimet sipas ritit ortodoks, duke nisur nga kremtimi i ndezjes së zjarrit
të shenjtë, simbol i dritës, që del nga Varri i Krishtit ditën e ngjalljes. Dje
Jeruzalemi ishte akoma i zhytur në heshtjen, me të cilën mbyllen kremtimet e Pashkëve
hebraike. Kjo heshtje përfundon me brohorinë e të krishterëve, kur në qytet dëgjohet
përshëndetja, në gjuhën arabe e greke: “Ha Massiah qam; Christos anésti; Cristo è
risorto – Krishti u ngjall!”. Por për kremtimin e Pashkëve në Jeruzalem, të dëgjojnë
Atë Pierbatista Picabalën, Rojtar françeskan i Tokës Shenjte, me telefon nga
Jeruzalemi.
Përgjigje:
- Shpresojmë se Jezusi, që vdes e ngjallet pikërisht këtu, në Jeruzalem,
do t’i ftojë të gjithë njerëzit, të cilët banojnë këtu, të pajtohen e të jetojnë një
jetë më të qetë, duke e pranuar e duke e dashur njëri-tjetrin.
Pyetje:
- Atë Picabala, si kremtohet Java e Madhe në Jeruzalem?
Përgjigje:
- Liturgjia në Jeruzalem, gjatë Javës së Madhe, është gjithnjë në lëvizje:
zhvendoset nga vendi në vend, pikërisht për të kujtuar ngjarjet e ndryshme: nga Gjetsemani,
në Çenakull, në Varrin e Zbrazët, në Malin e Ullinjve e kështu me radhë.
Pyetje:
- Ç’ mesazh u drejton Toka e Shenjtë të krishterëve për solemnitetin e Pashkëve?
Përgjigje:
- Nuk është përkujtim i ngjarjes, që ndodhi dymijë vjet më parë. Është
edhe kjo, por sidomos, ftesa për të shkuar atje, ku Jezusi na paraprin, e na paraprin
kudo, në Galile e në mbarë botën. Mesazhi i Pashkëve është pikërisht ky: paqe e gëzim!
Jezusi, që hyn në Çenakull, i përshëndet dishepujt e frikësuar pikërisht me fjalët
“Paqja me ju!”.
Pyetje: - Për Pashkë, Tokën Shenjte e vizitojnë
shumë shtegtarë. A e ndihmon kjo bashkësinë e krishterë vendase?
Përgjigje:
- Natyrisht po, Qyteti i vjetër i Jeruzalemit është përplot me shtegtarë
e parashikimet, në këtë drejtim, janë shumë të mira; parashikohet jo vetëm rikthimi
i shtegtarëve, por edhe rikthimi i mundësisë për të punuar, për shumë familje vendase.
Pyetje:
- Atë Picabala, edhe në atmosferën e Pashkëve ndjehet thellimi i krizës në Lindjen
e Mesme. Ç’mendoni ju për këtë situatë?
Përgjigje: - Situata
nuk është e mirë, sigurisht. Marrëdhëniet ndërmjet izraelitëve e palestinezëve vijojnë
të keqësohen, në Tokën Shenjte e në mbarë Lindjen e Mesme. Ndjehet fort klima e tensionit,
e edhe e lodhjes. Për fat të keq, nuk parashikohen ndryshime të shpejta, në kuptimin
pozitiv të fjalës. Mendoj se duhet një ndërhyrje energjike e bashkësisë ndërkombëtare,
për të siguruar pakëz më shumë stabilitet. E kjo, mendoj, do të vonojë shumë, sepse
në horizont nuk duket asgjë e re!