Mesazhi dhe Bekimi "Urbi et Orbi" - "Romës e Botës" (tekst i plotë).
(04.04.2010 RV)“Cantemus Domino: gloriose enim magnificatus est”. “T’i
këndojmë Zotit: mrekullisht ngadhënjeu!” (Liturgjia e orëve, Pashkë, Zyra e
Leximeve, Ant.1) Të dashur Vëllezër e Motra, Ju sjell kumtin e Pashkëve
me këto fjalë të Liturgjisë, të cilat na kujtojnë himinin e lashtë të lavdisë, që
kënduan hebrenjtë pas kalimit të Detit të Kuq. Rrëfen Libri i Daljes (cfr 15, 19-21),
se kur patën kaluar detin në të thatë e panë si egjiptianët plandoseshin në fund të
ujit, Miriami - motra e Moisiut dhe e Aronit – e gratë e tjera, kënduan, duke vallëzuar,
këtë këngë ngazëllimi: “T’i këndojmë Zotit; mrekullisht ngadhënjeu. Kalë e kalorës
i flaku në fund të detit”. Të krishterët e botës mbarë e përsërisin këtë këngë
gjatë Natës së pagjumë të Pashkëve e një lutje e posaçme na e shpjegon kuptimin e
saj: është lutje të cilën, në dritën e plotë të Ngjalljes, e bëjmë me gëzim tonën:
“O Hyj, shikojmë si shkëlqejnë edhe sot mrekullitë tuaja; atë që bëre me krahun tënd
të pushtetshëm për të çliruar një popull të vetëm nga zgjedha e faraonit, tani e
bën përmes ujit të Pagëzimit, për shëlbimin e të gjithë popujve; premto që mbarë njerëzimi
të pranohet ndërmjet bijve të Abrahamit e të marrë pjesë në dinjitetin e popullit
të zgjedhur”.
Ungjilli na rrëfeu si përmbushen premtimet e lashta: me vdekjen
e ringjalljen e vet, Jezu Krishti e çliroi njeriun nga skllavëria e plotë, ajo e mëkatit,
dhe i hapi udhën drejt Tokës së premtuar, Mbretërisë së Hyjit, Mbretërisë universale
të drejtësisë, të dashurisë e të paqes. Kjo ‘dalje’ nis, para së gjithash, në zemrën
e njeriut, i cili lind rishtas në Shpirtin Shenjt, si pasojë e Pagëzimit, që Krishti
na e dhuroi pikërisht në misterin e Pashkëve. Njeriu i vjetër ia lëshon vendin njeriut
të ri; jeta e mëparshme mbetet pas, mund të ecet në udhët e një jete të re (cfr.
Rm 6,4). Por ‘dalja’ shpirtërore është zanafillë e çlirimit të gjithanshëm, që
përtërin çdo përmasë njerëzore, personale e shoqërore.
Po, vëllezër, Pashkët
janë e vetmja rrugë shpëtimi për njerëzimin! Në se Krishti – Qengji i Hyjit – nuk
do ta kishte derdhur Gjakun e vet për ne, nuk do të kishim asnjë shpresë, fati ynë
e i botës mbarë do të ishte vdekja e pashmangëshme. Por Pashkët e përmbysën këtë
prirje: Ngjallja e Krishtit është krijesë e re; është si shartimi, që e përtërin gjithë
bimën. Kjo ngjarje ia ndryshoi një herë e përgjithmonë drejtpeshimin historisë, duke
e bërë të anojë nga e mira, nga jeta, nga falja. Jemi të lirë, jemi të shëlbuar! Ja
pse nga thellësitë e zemrës galdojmë: “T’i këndojmë Zotit: mrekullisht ngadhënjeu!”
Populli i krishterë, i dalë nga uji i Pagëzimit, është i ftuar në mbarë botën
ta dëshmojë këtë shëlbim, t’ia çojë të gjithëve frytin e Pashkëve, që është jeta e
re, e çliruar nga mëkati, së cilës i rikthehet bukuria zanafillës, mirësia e vërtetësia.
Gjatë dymijë vjetëve, vazhdimisht, të krishterët - e posaçërisht shenjtorët - e fekonduan
historinë me përvojën e gjallë të Pashkëve. Kisha është populli i daljes, sepse e
jeton vazhdimisht misterin e Pashkëve dhe e përhap forcën e tij përtëritëse në çdo
kohë e në çdo vend. Edhe në ditët tona njerëzimi ka nevojë për ‘dalje’, jo për ndreqje
artificiale, por për kthesë të vërtetë shpirtërore e morale. Ka nevojë për shëlbimin
e Ungjillit, që të dalë nga kriza e thellë e cila, si e tillë, kërkon edhe ndryshime
të thella, duke nisur nga ndërgjegjet.
I lutem Zotit Jezus që në Lindjen e
Mesme, e posaçërisht në Tokën e shenjtëruar nga vdekja e ngjallja e tij, Popujt të
‘dalin’ vërtetë e përfundimisht nga lufta e nga dhuna, për të hyrë në paqe e harmoni.
Për bashkësitë e krishtera të cilat, posaçërisht në Irak, kalojnë prova e mundime,
uroj që i Ngjalluri t’u përsëritë fjalën e ngarkuar me ngushëllim e guxim, të cilën
ua pati drejtuar Apostujve në Çenakull: “Paqja me ju!”.
Vendeve të Amerikës
Latine e të Karaibeve, të vëna në provë nga shtimi i krimeve, që lidhen me tregtimin
e drogës, Pashkët e Krishtit u sjellshin fitoren e bashkëjetesës paqësore e të respektit,
për të mirën e përbashkët. Uroj që popullsia e dashur e Haitit, e shkatërruar nga
tragjedia e madhe e tërmetit, ‘të dalë’ nga morti e nga dëshpërimi, për të hyrë në
rrugën e shpresës së re, e mbështetur nga solidariteti ndërkombëtar. Qytetarët e dashur
kilianë, të ligështuar nga katastrofa e rëndë, por të përforcuar nga feja, i uroj
ta përballojnë me guxim veprimtarinë e rindërtimit.
Me forcën e Jezusit të
Ngjallur, uroj Afrika të dalë nga konfliktet, të cilat vijojnë t’i shkaktojnë shkatërrim
e vuajtje e të sigurojë atë paqe e atë pajtim, që janë garanci për zhvillimin. Posaçërisht
ia besoj Zotit ardhmërinë e Republikës Demokratike të Kongos, të Guinesë e të Nigerisë.
Krishti
i Ngjallur i ndihmoftë të krishterët që, për shkak të fesë së tyre, përballojnë persekutime
e vdekje, si në Pakistan. Vendeve të tronditura nga terrorizmi e nga diskriminimi
shoqëror e fetar, Krishti u dhëntë forcë për të ecur në rrugën e dialogut e të bashkëjetesës
paqësore. Udhëheqësve të të gjitha Kombeve, Pashkët e Krishtit u sjellshin dritë e
forcë që, më në fund, ta vendosin veprimtarinë ekonomike e financiare mbi bazën e
kritereve të së vërtetës, të drejtësisë e të ndihmës vëllazërore. Forca shëlbuese
e ngjalljes së Krishtit i dhëntë fuqi mbarë njerëzimit t’i kapërcejë shprehjet e shumta
e tragjike ‘të kulturës së vdekjes’, që përpiqet ta pushtojë botën, e të ndërtojë
ardhmërinë e dashurisë e të vërtetësisë, në të cilën çdo jetë njerëzore respektohet
e mirëpritet. Të dashur vëllezër e motra! Pashkët nuk bëjnë kurrfarë magjie. Ashtu
si hebrenjtë, që përtej Detit të Kuq gjetën shkretëtirën, edhe Kisha, pas Ringjalljes,
gjen gjithnjë historinë, me gëzimet e veta e shpresat e veta, me dhimbjet e veta e
me ankthet e veta. E, megjithatë, kjo histori ndryshoi, lidhi një besë të re e të
amshuar, i hapi të gjitha rrugët drejt së ardhmes. Prandaj, të shpëtuar përmes shpresës,
vijojmë shtegtimin tonë, në sa zemrat janë plot me këngën e lashtë, e gjithnjë të
re: “T’i këndojmë Zotit: mrekullisht ngadhënjeu!”.