Papa në Udhën e Kryqit: duke shndërruar urrejtjen në dashuri, Kryqi i Krishtit e ndryshon
botën (Tekst i plotë)
(03.04.2010 RV)Dashuria e Zotit mbi Kryq është e vetmja forcë, e aftë për ta
ndryshuar botën, për ta shndërruar vdekjen në jetë; tradhtinë në miqësi; urrejtjen
në dashuri: këtë nënvizoi mbrëmë Papa, në përfundim të Udhës tradicionale të Kryqit
në Koloseum. Ja teksti i plotë:
Të dashur Vëllezër e Motra, në
lutje, me shpirtin thellësisht të prekur, përshkuam sonte Udhën e Kryqit. U ngjitëm
në Kalvar me Jezusin e medituam mundimet e Tij, duke rizbuluar sa e madhe është dashuria
që ai pati e vijon të ketë për ne. Por në këtë çast nuk duam të kufizohemi me një
mëshirë të diktuar vetëm nga ndjenjat tona të ligështa; duam të marrim pjesë në vuajtjen
e Jezusit, duam ta shoqërojmë Mësuesin tonë, duke i ndarë bashkë me Të mundimet në
jetën tonë, në jetën e Kishës, për jetën e botës, nga që e dimë mirë se pikërisht
në Kryqin e Zotit, në dashurinë e tij pa kufi, që dhuron gjithë vetveten, është burimi
i hirit, i çlirimit, i paqes, i shëlbimit. Tekstet, meditimet e lutjes
së Udhës së Kryqit, na ndihmuan ta kundrojmë këtë mister të Mundimeve, për ta kuptuar
mësimin e pamasë të dashurisë, dhuruar nga Zoti mbi Kryq, që të lindë në shpirtin
tonë një dëshirë e re për shndërrimin e zemrës, duke e jetuar çdo ditë të njëjtën
dashuri, e vetmja forcë, e aftë për ta shndërruar botën. Sonte e
kundruam Jezusin në fytyrën e Tij plot dhimbje, të tallur, të tjetërsuar, të shpërfytyruar
nga mëkati i njeriut; nesër mbrëma do ta kundrojmë në fytyrën e tij përplot me gëzim,
rrezëlluese, të ndritshme. Që kur Jezusi zbriti në varr, varri e vdekja nuk janë më
vende pa shpresë, ku historia mbyllet plotësisht e dështuar, ku njeriu prek kufirin
e pafuqishmërisë së tij. E Premtja e Shenjtë është dita e shpresës më të madhe, asaj
që fiton pjekurinë e plotë mbi Kryq, ndërsa Jezusi vdes, ndërsa jep frymën e fundit,
duke lëshuar britmën e fortë: “Atë, në duart tua po e dorëzoj shpirtin tim!”(Lk.23,36).
Duke e dorëzuar jetën e ‘dhuruar’ në duart e Atit, Ai e di se vdekja e tij bëhet burim
jete, ashtu si fara në tokë, që duhet të copëtohet, për të lindur filizi i ri: “Po,
kokrra e grurit, e rënë në tokë, copëtohet, kalbet, vdes, e prandaj mund të japë fryt.
Që nga dita kur Krishti u lartua, Kryqi, që duket si simbol i braktisjes, i vetmisë,
i dështimit, u bë fillim i ri: nga thellësitë e vdekjes, lartohet premtimi i jetës
së pasosur. Mbi Kryq shkëlqen sot drita ngadhënjyese e agimit të Pashkëve. Në
heshtimin e kësaj nate, në heshtjen, që mbështjell të Shtunën e Madhe, të prekur nga
dashuria e pakufishme e Zotit, jetojmë në pritje të agimit të së tretës ditë, agimit
të fitores së Dashurisë së Zotit, agimit të dritës, përmes së cilës sytë e zemrës
mund ta shikojnë në mënyrë të re jetën. Vështirësitë, vuajtjet, dështimet, zhgënjimet,
hidhërimet, që duken sikur do të shembin gjithçka, ndriçohen nga shpresa. Akti i dashurisë
mbi Kryq, pranohet nga Ati e drita vezulluese e Ngjalljes mbështjell e shndërron gjithçka:
nga tradhtia mund të lindë miqësia; nga mohimi, falja; nga urrejtja, dashuria!O
Zot, na ndihmo ta mbartim me dashuri kryqin tonë, kryqet tona të përditshme, të sigurtë
se ndriçohen nga drita e Pashkëve Tua. Amen.