Maria tek këmbët e Kryqit është burim jete në rrugën e së vërtetës
(03.04.2010 RV)Kryqi është vendi i dhimbjes e i dashurisë. Tek këmbët e Kryqit
shikojmë Marinë, pranë të Birit në grahma e në pritje të ringjalljes. Thua mundet
mendja njerëzore të përfytyrojë një ikonë më të dhimbshme se kjo e Nënës, pushtuar
nga një tronditje e papërshkrueshme, në sa kundron si shuhet i Biri mbi Kryq? Kësaj
pyetjeje i përgjigjet Atë Ermano Toniolo, rregulltar i Urdhërit të Shërbëtorëve
të Marisë, në mikrofonin tonë:
Përgjigje: - Koncili II i Vatikanit
na jep një figurë të mrekullueshme të Virgjërës Mari, e cila nuk është nënë e zakonshme.
Është Ajo, që shtegtoi gjatë në udhët e fesë, jo vetëm si grua, por sidomos si Nënë
e Birit të Zotit. E ky shtegtim e çoi te këmbët e Kryqit në natën e gjatë e të errët
të fesë, pasi e pati ndjekur të Birin për 33 vjet radhas. Qëndroi me kokën lart,
duke vuajtur thellësisht me Birin e vetëm, duke e shoqëruar me shpirt amtar në këtë
orë të trishtë të flijimit. Kjo është figura, që na jep Koncili. Nëna te Këmbët e
Kryqit e kreu rrugën e saj të fesë e të dashurisë.
Pyetje: - Në Ungjill
vihet theksi mbi amësinë e Marisë. E amësi do të thotë ta mbrosh, ta ruash, ta bësh
të rijetojë jetën, sipas shembullit të Zojës së Bekuar…
Përgjigje: -
Po, por amësinë e Marisë mund ta shikojmë në aspekte të ndryshme! Është amësi, që
nis duke e ruajtur, që në kraharor, mugullin e një jete në zanafillë. Nuk është mugulli
i një jete thjeshtë njerëzore, është i Birit të Zotit, që mishërohet në kraharorin
e saj. E Ajo, duke e veshur me mishin e gjakun e vet të papërlyer, e shoqëroi që në
çastin e parë, e nxori në dritë dhe e pa duke u rritur përpara syve. E u rrit edhe
vetë pranë Tij. U rrit në përmasën e amësisë. U rrit deri në atë masë, sa të arrinte
në lartësinë e Kryqit. Në Kryq amësia e saj u formua përfundimisht. Ajo, që kundrojmë
tek këmbët e Kryqit është “NËNA!”.
Pyetje: - Si e përshkruan Papa Marinë
tek këmbët e Kryqit?
Përgjigje: - Në enciklikën e tij “Spe salvi” Benedikti
XVI shkruan se në Orën e Kryqit, kur gjithçka iu duk si dështim, ku e pa pasardhësin
e Davidit, Birin e Hyjit, duke vdekur si mjeran, të tallur e të pështyrë, ndërmjet
hajdutëve, në Orën, kur buzët e tij të përgjakura shqiptuan fjalët: “Grua, ja yt bir!”,
pikërisht në këtë Orë në mendjen e saj jehuan rishtas fjalët e Engjëllit: “Mos ki
frikë, Mari!”. E kështu Nëna bëhet figurë e fesë së patundshme, figurë e shpresës,
bazuar mbi fjalën e natyrën e Birit, mbi besnikërinë e Atit e të planit të tij të
patundshëm të dashurisë për ne. “Mos ki frikë, Mari!”. Kur gjithçka duket sikur merr
fund, pikërisht atëhere nis gjithçka, sepse troket gjithmonë ‘Ora e Zotit”, vjen gjithmonë
‘e Treta ditë’, dita e dashurisë, që Ati është gati t’ua dhurojë të gjithë bijve të
vet!
Pyetje: - Gënjeshtrat, që njerëzve u shkojnë aq për shtat e që
e çuan Zotin në kryq, sot kanë vënë në shënjestër Kishën e Papën.... Si mund ta
lexojmë këtë kohë, parë me sytë e Marisë?
Përgjigje: - Mendoj se një
Nënë di gjithnjë të vuajë, të kuptojë e ta presë kthimin e bijve. Nënat nuk dënojnë,
aq më pak, Nëna e të shëlbuarve: janë të gjithë bijtë e saj. Si ai që sulmohet padrejtësisht,
në krye të Kishës, ashtu edhe ata, që e sulmojnë. Janë të gjithë bijtë e saj. Edhe
kryqëzuesit u bënë bijtë e saj, ndërsa talleshin me atë, që po jepte shpirt, me Zotin
e tyre. Sot sytë e Zojës së Bekuar mund të mjegullohen nga lotët e zemra e saj, nga
trishtimi. Por Nënës nuk do t’i mungojë kurrë aftësia për të kuptuar, për të pasur
mëshirë, për t’u lutur që të gjithë të rikthehen – siç kujton shpesh herë Papa – në
rrugën e së vërtetës e që të kenë jetë!