Atentat tjetër kamikaze në Kaukaz: së paku 12, viktimat
(31.03.2010 RV)Jo më larg se 48 orë nga atentatet në metropolitanën e Moskës,
terrorizmi kaukazian godet sërish Rusinë. Teatër dhune, kësaj radhe, është qyteti
i Kizliarit në Dagestan. Dy kamikaze shpërthyen edhe këtu në qendrën e qytetit, madje
i dyti nën hundën e policisë. Numri i viktimave është 12, ndër të cilët edhe policë.
18 persona të shërbimit të sigurimit janë plagosur. Kryeministri rus, Vladimir Putin
deklaroi se regjia e këtyre atentateve është e njëjtë. Ndërkaq, dje, në të gjithë
Rusinë, u mbajt zi për të vrarët moskovitë. Autoritetet e konsiderojnë çështje nderi
kapjen dhe dënimin e përgjegjësve.