У Ватыкане быў абвешчаны расклад вялікодных набажэнстваў пад кіраўніцтвам Святога
Айца
Апостальская Сталіца абвясціла расклад набажэнстваў, якія ўзначаліць Святы Айцец Бэнэдыкт
XVI у перыяд Вялікага тыдня і ва ўрачыстасць Вялікадня. 28 сакавіка 2010 г., у
Пальмовую нядзелю, Папа благаславіць пальмовыя галіны на плошчы перад ватыканскай
базылікай, узначаліць урачыстую працэсію і ранішнюю святую Імшу. У Вялікі чацвер,
1 красавіка, Пантыфік будзе цэлебраваць два набажэнствы: раніцай у базыліцы святога
Пятра адбудзецца літургія і цырымонія асвячэння алеяў, а ўвечары — Імша Вячэры Пана,
якая адбудзецца ў Латэранскай базыліцы. Усе сродкі, сабраныя падчас гэтай літургіі,
прызначаюцца на дапамогу Гаіці і пойдуць на адбудову семінарыі, разбуранай землятрусам.
Увечары ў Вялікую пятніцу, 2 красавіка, Святы Айцец будзе цэлебраваць
літургію Мукі Пана ў ватыканскай базыліцы і ўзначаліць Крыжовы шлях у рымскім Калізеі.
Увечары ў суботу, 3 красавіка, Папа правядзе ў базыліцы святога Пятра
Пасхальную Вігілію, а раніцай у нядзелю — велікодную святую Імшу на плошчы Святога
Пятра. Апоўдні Пантыфік выйдзе на балкон базылікі, каб абвясціць традыцыйнае пасланне
«Urbi et orbi» («Гораду і свету»).