(25.03.2010 RV)Sot, Kisha Katolike kremton festën e Lajmërimit të Zotit. Kujtojmë
se sipas një tradite shumë të lashtë, shtëpia e Marisë, ku Engjëlli Gabriel i solli
Virgjërës lajmin e Mishërimit të Zotit, identifikohet me shpellën e cila sot ndodhet
në kriptën e Bazilikës së Lajmërimit në Nazaret. Një pjesë e kësaj shtëpie, gjithnjë
sipas traditës – u mbart mrekullisht nga disa engjëj nga Nazareti në Loreto, në zonën
italiane të Markeve. Shtëpia e Shenjtë – siç quhet - ndodhet edhe sot në Bazilikën
e Loretos, deklaruar nga Gjon Pali II ‘Shenjtërore ndërkombëtare”, cak shtegtimesh
për mijëra besimtarë nga të katër anët e botës. E 25 marsi, ditë tradicionale
e Lajmërimit të Zotit kremtohet nga Kisha edhe si ditë e jetës. Është dita kur Kisha
kujton lajmërimin dhe pranimin e planit të Zotit nga Virgjëra Mari. Në shtëpinë e
vogël të Nazaretit, nën strehën e Marisë, në çastin kur Ajo iu përgjigj "po" ëngjëllit,
filloi ngjarja më e madhe që ka njohur ndonjëherë njerëzimi. Në jetën njerëzore nisi
të banojë vetë Zoti. Zoti u bë njeri. Ç'ngjarje më e madhe mund t'i ndodhte njeriut?
Dëshirojmë prandaj, duke u nisur nga kjo ditë, të rifillojmë këngën e jetës, nga fillimi
e deri në mbarim. T'i themi "Po" jetës, sepse jeta është e bukur, sepse jeta është
dhuratë e Zotit, sepse jeta është një aventurë e mahnitshme, sepse jeta duhet jetuar
duke kënduar "Magnificat" - "Zemra ime madhëron Zotin".
Poeti ynë kombëtar,
Atë Gjergj Fishta, i këndon kështu, në poezinë "Nuncjata", ndikimit që pati kjo ngjarje
e madhe mbi gjithë njerëzimin:
T’falna, Mrí ! edhe na po t’ thona, O Zojë
Virgjin hire-plote! E nder gzime e kobe t’ona, Qi na i sjellin t’egrat mote, E
kur n’nadje t’zbardhe drita, E kur n’mbrame t’erret dita: T’falna, Mri, na t’
thom’ me gzim!