Dita Botërore kundër Tuberkulozit: gati dy milion të vdekur në vit
(24.03.2010 RV)Më 24 mars 1882, mjeku Robert Koh zbuloi bacilin e tuberkulozit.
Për të kujtuar këtë çast të rëndësishëm për njerëzimin, çdo 24 mars kremtohet Dita
Botërore kundër Tuberkulozit. Çdo vit, kjo sëmundje shkakton 2 milion vdekje në të
gjithë planetin. Sipas vlerësimeve të OKB-së, në vitin 2008 janë infektuar 9,4 milion
vetë me një sëmundje, që mund të kurohet fare mirë me ilaçet në dispozicion. Organizata
Botërore e Shëndetësisë sinjalizon se diagnostikimi i tuberkulozit është bërë më i
vështirë, prandaj kurimi i sëmundjes nuk bëhet në fazën e saj të parë, më të lehtë.
Ilaçet duhen marrë për gjashtë muaj dhe vaksina shpesh nuk jep rezultat, prandaj mjekët
po kërkojnë ilaçe e vaksina të reja, por edhe strategji ndërkombëtare, që të çojnë
kurat më pranë të varfërve e njerëzve nevojtarë.