Երեւանի
Աւետիք Իսահակեանի անուան քաղաքային գրադարանի դահլիճին մէջ տեղի ունեցած է բանաստեղծ՝
Վահէ Արսէնի ՜՜Կանաչ աստուածներու վերադարձը՝՝ խորագիրով գիրքին հայերէն եւ հոլանտերէն
տարբերակներու շնորհահանդէսը։
Նոյն ժողովածուին, որ յետխորհրդային տարիներու
հոլանտերէնի թարգմանուած առաջին հայերէն գիրքն է, շնորհահանդէսը տեղի ունեցած էր, 2
փետրուարին, Հոլանտայի Մաասլուս քաղաքի Արուեստներու կեդրոնին մէջ։
Նշենք, որ
Երեւանի մէջ կայացած շնորհահանդէսին ընթացքին Վահէ Արսէնին նուիրուած է Հոլանտայի երիտասարդ
գրողներու ամէնամեայ Jambe 2010 մրցանակը, որ շնորհուած է անոր ՜՜Կանաչ աստուածներու
վերադարձը՝՝ բանաստեղծութիւններու ժողովածուին համար։
Գեղանկարիչ Վարդգէս
Սուրէնեանցի ծննդեան 150-ամեակը Հայաստանի Ազգային գրադարանին մէջ։
Հայաստանի
Ազգային գրադարանի նիստերու դահլիճին մէջ վերջերս տեղի ունեցաւ յիշատակի ձեռնարկ՝ նուիրուած
հայ ազգային պատմանկարչութեան հիմնադիր, տաղանդաւոր գեղանկարիչ Վարդգէս Սուրէնեանցի ծննդեան
150-ամեակին։
Վարդգէս Սուրէնեանց ծնած է 27 փետրուար 1860-ին, Ախալցխա։ Հայ կերպարուեստի
պատմութեան մէջ Վարդգէս Սուրէնեանց կը համարուի ազգային պատմանկարչութեան հիմնադիրը։
Ան իր նախնական կրթութիւնը ստացած է Լազարեան ճեմարանին մէջ, այնուհետեւ ուսումը շարունակած
է Մոսկուայի գեղանկարչութեան, քանդակագործութեան, ճարտարապետութեան ուսումնարանի ճարտարապետութեան
բաժանմունքին մէջ։ Վ Սուրէնեանց մահացած է 6 ապրիլ 1921-ին։ Նշենք, որ անոր կտաւներուն
մեծ մասը պահպանուած եւ ցուցադրուած է Հայաստանի Ազգային պատկերասրահին մէջ։