Atë Lombardi: Papa është gjithnjë kundër kulturës së heshtjes, kur bëhet fjalë për
shpërdorime seksuale.
(20.03.2010 RV)Papa është impenjuar gjithnjë kundër kulturës së fshehjes e
të heshtjes: këtë pohon drejtori i Sallës vatikanase të Shtypit, Atë Federiko Lombardi
i cili, gjatë një takimi të shkurtër, u shpjegoi gazetarëve përmbajtjen e Letrës baritore
të Papës drejtuar besimtarëve irlandezë. Një dokument, tha Atë Lombardi, që e dënon
rëndë pedofilinë e nuk bën asnjë lëshim, kur është fjala për të vërtetën e për drejtësinë.
Vërtetësi,
vetëdije, dhimbje, pendesë, impenjim: Atë Federiko Lombardi theksoi fjalët kyçe për
të shpjeguar kuptimin e vërtetë të Letrës së Papës drejtuar besimtarëve irlandezë.
Një dokument, vërejti rregulltari jezuit, i shkruar me stil të thjeshtë, me ndjenja
atërore, me frymë prekëse, shenjë që tregon se Papa vuan bashkë me viktimat e shpërdorimeve.
Një Letër e kësaj natyre, pohoi, nuk është shkruar deri më sot nga asnjë Papë: “Është
një dokument i ndershëm, i sinqertë, që nuk kërkon shfajsim. Letra baritore përqendrohet
me ndershmëri e drejtësi tek Kisha, tek përgjegjësitë e anëtarëve të Kishës, tek vuajtja
që i shkaktuan të tjerëve, e nuk përpiqet t’i bëjë dredha problematikës". Atë
Lombardi vuri theksin edhe mbi realizmin e Papës i cili, para se ta botonte këtë Letër,
u njoh me raportet qeveritare irlandeze Ryan e Murfy dhe u takua me ipeshkvijtë e
vendit: “Papa nuk mendon se është diçka e thjeshtë, që mund të zgjidhet
shpejt e shpejt. Ai thotë: “Ky është vetëm hapi i parë i një rruge të gjatë”. Duke
iu përgjigjur pyetjeve të gazetarëve, Atë Lombardi vuri theksin mbi impenjimin e Papës
kundër pedofilisë në Kishë e kundër kulturës së heshtjes, që kur ishte kardinal: “Kush
e njeh situatën e edhe detyrën e kryer nga Papa, bindet se Papa ka kërkuar vazhdimisht
të sqarohet gjithçka, pa fshehur asgjë e se, edhe gjatë kohës kur kryesonte Kongregatën
për Doktrinën e Fesë, nuk punoi që t’i mbulonte, ose t’i fshihte problemet, por u
përpoq me vendosmëri gjithnjë më të madhe t’i sqaronte e të ndërhynte për t’u dhënë
fund”. Letra, tha drejtori i Sallës së Shtypit të Selisë së Shenjtë, është
një dokument baritor e prandaj nuk ndalohet tek masat administrative e juridike, që
kanë të bëjnë me dorëheqjen e mundshme të prelatëve irlandezë, vendime të cilat natyrisht
i takojnë Papës. Njëkohësisht, drejtori i Sallës së Shtypit të Selisë së Shenjtë shpjegoi
se sot për sot nuk po përgatitet ndonjë dokument i Kongregatës për Doktrinën e Fesë
mbi këtë çështje. Atë Lombardi ripohoi, më pas, se njerëzit e Kishës janë të thirrur
të respektojnë ligjet e vendeve ku jetojnë dhe të bashkëpunojnë me autoritetet civile.
Kisha, shtoi, paraqitet si autoritet moral, e prandaj këto krime bëhen edhe më të
shëmtuara, kur kryhen nga kishtarët. Së fundi, lidhur me situatën e shpërdorimeve
në Gjermani, Atë Lombardi pohoi se çdo vend ka veçantinë e vet e se i takon Papës
të zgjedhë kohët e mënyrat e veprimit.