Koncert në Vatikan për ditën e emrit të Papës: “Fjalët e fundit të Krishtit në Kryq”
kompozuar nga Hajdn.
(19.03.2010 RV)Sot pasdite në Sallën Klementine të Pallatit Apostolik, Benedikti
XVI ndoqi koncertin “Shtatë fjalët e fundit të Krishtit”, kompozouar më 1786 nga Jozef
Hajdn (1732-1809), luajtur nga kuarteti Henschel i harqeve dhe nga mexosopranoja Suzanë
Kelling, në variantin e ri të ‘Mundimeve’ të Hajdn-it të Hosè Peris Lakasa, organist
nderi në kapelën e Pallatit Mbretëror në Madrid.
“Udhë për të prekur deri
në thellësitë e shpirtit edhe dëgjuesin më pak të mësuar me muzikën”: kështu shprehej
Hajdn për këtë vepër instrumentale. Shtatë Sonata, një për çdo frazë të shqiptuar
nga Krishti mbi Kryq, që nga “Atë, fali ata, sepse nuk dinë ç’bëjnë”, deri tek “Atë,
në duart tua po e lëshoj shpirtin tim”. Lutja e Krishtit – vëren Benedikti XVI – arrin
kulmin e vet në Kryq, ku flet fjalët e fundme, mbledhur nga ungjilltarët: “Atje
ku duket se shpërthen në një britmë dëshpërimi: “Hyji im, Hyji im, pse hoqe dorë prej
meje?”(Mt. 27, 46); Mk. 15,34; cfr Sal 21,1), në të vërtetë Krishti
bën të vetën lutjen e njeriut që, i rrethuar pa shpresë, nga armiqtë, provon hirin
dhe shpëtimin”(Mesha e së Mërkurës së Përhime, 6 shkurt 2008). Prandaj
– nënvizon Papa - mund të themi se nuk ka kundërvënie ndërmjet ankimit: “Hyji im,
Hyji im, pse hoqe dorë prej meje?”, dhe fjalëve plot besim bijnor: “Atë, në duart
e tua po e dorëzoj shpirtin tim!”(Lk 23,46; cfr Ps. 30,6): “Edhe këto
janë marrë nga një Psalm, i 30-ti, lutje dramatike e një njeriu që, i braktisur nga
të gjithë, ia beson plotësisht vetveten Hyjit. Lutja plot shpresë është edhe lajtmotiv
i Krezhmëve e na bën ta shikojmë Hyjin si spirancën e vetme të shpëtimit. Përballë
rrezikut të madh, edhe shpresa duhet të jetë e madhe, e kjo shpresë mund të vijë vetëm
nga Zoti (Mesha e së Mërkurës së Përhime, 6 shkurt 2008). Në Kryq
duket qartë pushteti mbretëror i Krishtit, por edhe mbi Kalvar vihen ballë për ballë
dy qëndrime të kundërta: “Disa persona në këmbët e Kryqit, e edhe njeri nga
hajdutët, i drejtohen të Kryqëzuarit me përbuzje: “Në se ti je Krishti, Mbreti Mesi
– i thonë, duke e përqeshur - shpëto vetveten e zbrit nga kryqi. Por pushteti mbretëror
i Krishtit është krejt i veçantë, sepse manifestohet pikërisht mbi Kryq: Jezusi, i
poshtëruar e i tallur, e zbulon lavdinë e tij duke ndenjur mbi Kryq, si Qengj i flijuar.
Në mënyrë të papritur hajduti i mirë e pranon pushtetin mbretëror të të drejtit të
pafajshëm: e sheh të kryqëzuar, e quan Mbret e i lutet: “Të bjerë ndër mend për mua,
o Jezus, kur të arrish në Mbretërinë tënde” (Mesha për Koncistorin, 25
nëntor 2007). E kësaj lutjeje Jezusi i jep përgjigjen e jashtëzakonshme: “Sot
do të jesh me mua në Parajsë”, Ja, pra, kjo është fjala që i përmbledh të gjitha fjalët
e Jezusit mbi Kryq: Falja! “Jezusi mund të japë faljen e edhe forcën për
të falur, sepse ai vetë i ka pësuar pasojat e mëkatit dhe i ka shkrirë në flakën e
dashurisë së tij. Falja vjen nga Kryqi; ajo e shndërron botën me dashurinë, që dhurohet.
Zemra e Krishtit, e hapur mbi Kryq, është porta nëpër të cilën hyhet në botën e hirit
e të faljes. E vetëm ky hir mund ta shndërrojë botën e t’i japë paqen”
(Mesha e Rrëshajëve, 15 maj 2005).