З гэтага часу Чорная Мадонна панясе ва ўласным ўборы камяні з Месяца, Меркурыя і Марса.
Папа Рымскі блаславіў дзве новыя кароны для абраза Чорнай Мадонны Чэнстахоўскай. Гэтыя
ювелірныя шэдэўры былі створаны з ахвяраванняў тысяч палякаў, прынесеных паводле малітоўных
абяцаньняў у падзяку за цудоўныя падзеі. Чэнстахоўская Мадонна, галоўная святыня Польшчы,
вельмі вядома таксама і ў нашай краіне і шануецца як цудатворная роўна каталікамі
і праваслаўнымі. Дэлегацыя на чале з прыёрам кляштара паўлінаў на Яснай Гуры аб. Раманам
Маеўскім прадставіла кароны Бенедыкту XVI на прыканцы генеральнай аўдыенцыі 3 сакавіка.
Аўтар карон - вядомы майстра з Гданьска Марыюш Драпікоўскі. Кароны выкананыя з
золата, і, па словах аўтара, нясуць у сабе глыбокі сымбалізм. Багародзіца, як Месяц,
свеціць адлюстраваным святлом Хрыста-сонца. Тры зоркі ў цэнтры кароны Божай Маці сімвалізуюць
тое, што яна заўсёды Дзева, падчас і пасля нараджэння Езуса. У гэтых зораках выкарыстаны
камяні з Месяца, Марса і Меркурыя. Яны былі ахвяраваны кляштару прыкладна два гады
таму, пры гэтым сапраўднасць камянёў пацверджана лабараторыяй NАSА. Акрамя таго,
карона ўпрыгожана бурштынавымі лілеямі з украпінамі расліннага арнаменту і шасціканцовымі
зоркамі. На падставе кароны голуб, які сімвалізуе Святога Духа, па баках - камяні
з Грота ў Назарэце. На зубцах змешчаныя сем буйных пярлінаў рэдкага блакітнага колеру.
Карона Хрыста ўпрыгожана дыяментамі і рубінамі. У яе падставе змешчаны камень
з Галгофы, перададзены францысканцамі. У цэнтры знаходзіцца упрыгожванне XVII стагоддзя
з сімваламі мукі Пана. Наверсе кароны знаходзіца крыж на бурштынавым яблыке. Усяго
ў абодвух каронах змешчана больш за 2100 брыльянтаў.