Papa Veprimit Katolik në Afrikë: nxisni solidaritetin dhe respektimin e dinjitetit
të njeriut
(18.03.2010 RV)Nga data 10 deri në datën 14 mars, në Kigali të Ruandës, u mbajt
takimi IV kontinental i Lëvizjeve të Veprimit Katolik në Afrikën lindore e qendrore.
Me një telegram të nënshkruar nga Sekretari i Shtetit të Vatikanit, kardinali Tarçizio
Bertone drejtuar asistentit kishtar të Forumit Ndërkombëtar të Veprimit Katolik, imzot
Domeniko Sigalini, Papa shpreh vlerësimin e tij për nismën, duke nënvizuar sa i rëndësishëm
është afirmimi i vlerave shpirtërore për të nxitur solidaritetin e vërtetë dhe respektimin
e dinjitetit të njeriut. Takimi ishte formues për përgjegjësit dhe për asistentët
e Veprimit Katolik. Në të u morën në shqyrtim sfidat e ungjillëzimit dhe të respektimit
të dinjitetit njerëzor, si varfëria, padrejtësia shoqërore, shpërdorimi i qeverisjes,
pasiguria e vazhdueshme, korrupsioni, mosrespektimi i vlerave, urgjenca e pajtimit,
nevoja për kulturën e paqes, nevoja e formimit global e sidomos formimi sipas Doktrinës
Shoqërore të Kishës.