Papa afaristëve: përparësia punë dinjitoze për të gjithë
(18.03.2010 RV)Dinjiteti i njeriut
të jetë gjithnjë në qendër të ekonomisë, edhe në kohë krize: Papa u fliste kështu
afaristëve të Romës, të cilët i priti sot në Vatikan, por fjalët e tij vlejnë për
të gjithë botën e biznesit, në çdo vend të botës. Benedikti XVI përmendi enciklikën
e tij të fundit “Caritas in Veritate” për të theksuar se ndërmarrjet e firmat duhet
të jenë gjithnjë në shërbim të njeriut. Ati i Shenjtë pohoi edhe se politika nuk u
duhet nënshtruar mekanizmave financiare. Pastaj, foli për emergjencën e punësimit,
sidomos në botën rinore. Gjetja e një pune dinjitoze për të gjithë, duhet të jetë
përparësi, tha Papa: “Ajo që e udhëheq Kishën për të promovuar një qëllim të
tillë është bindja se puna është e mirë për njeriun, për familjen e për shoqërinë,
burim lirie e përgjegjësie”. Në arritjen e këtij qëllimi, shpjegoi Papa, duhet
të mbështeten sidomos afaristët, të cilët kryejnë këtë shërbim për shoqërinë dhe për
të mirën e përbashkët. Benedikti XVI u njohu atyre sakrificat e shumta për hapjen
dhe hyrjen e firmave në tregun global, si edhe përpjekjet për të mos pushuar askënd
nga puna. E nënvizoi: “Në këtë kontekst, është e rëndësishme të kapërcehet
ai mentalitet individualist dhe materialist, që sugjeron largimin e investimeve nga
ekonomia reale për të privilegjuar impenjimin e kapitaleve në tregjet financiare,
ku parashikohen fitime më të lehta e më të shpejta”. Duhet, shtoi Ati i Shenjtë,
një humanizëm i krishterë, që të gjallërojë dashurinë e bamirësinë edhe në aktivitetet
e afaristëve, në vendimet e tyre ekonomike e financiare. Papa tregoi disa rrugë për
të dalë nga kriza: të krijohet një rrjet i përbashkët me realitetet e tjera shoqërore,
të investohet në punën kërkimore-shkencore, të mos bëhet konkurrencë jo korrekte ndërmjet
firmave dhe të mos harrohen detyrat shoqërore, që ka secili: “Vetë kriza financiare
ka treguar se në një treg të shkatërruar nga falimentimet zinxhir, kanë rezistuar
ato subjekte ekonomike, të afta të veprojnë sipas moralit të drejtë dhe të kujdesshme
ndaj nevojave të territorit”. Papa theksoi se kriza duhet jetuar me besim,
pasi mund të konsiderohet një mundësi për të rishikuar modelet e zhvillimit dhe për
të riorganizuar botën e financës: “Ndërmarrja mund të jetë vitale dhe të prodhojë
“pasuri për shoqërinë”, nëse afaristët janë largpamës, preferojnë investimin afatgjatë
para fitimit me spekullime dhe nxisin rinovimin, në vend që të mendojnë si të grumbullojnë
pasuri vetëm për vete”.